Атырауда айрықша ескерткіш орнатылады

Ауған соғысы ардагерлері мен құрбандарына арналған ескерткіш жобасын ұсынып отырған ҚР-дың еңбек сіңірген қайраткері, халықаралық Сәулет академиясының профессоры Саматбек Бөкебайдың есімі атыраулықтарға жақсы таныс.

Ауған соғысы ардагерлері мен құр­бандарына арналған ескерткіш ала­ңының ескерткіштің жобасы Аста­надағы арнайы комиссия сарабынан өтіп, бекітілген.

Ескерткіштің жалпы биіктігі 10 метрдей. Шығыс елінің символикасын білдіретін күмбез тәріздес көмкерілген арка астына биіктігі 3 метрдей мүсін орналасады, онда бір-біріне арқа жонын тіреп, қолдарына қару ұстаған екі жауынгер бейнеленген. Жобадағы қызыл жұлдыз – Ауған соғысының Кеңес Одағы кезінде болғанын еске түсіретін белгі.

Жобада жоғарғы алаңдағы 10 баспа – 10 жыл (1979-1989ж ж.) соғысты біл­діреді. Ақ арка силуэті, биіктігі 9 метрді құрайтын бітеу жар – Ауғанстандағы шың-шатқалдардың жиегін, Кеңес солдаттары жанын пида еткен жерлерді білдіреді. Құлпытасқа Ауған соғысына қатысқан және қаза болған жауын­герлердің аты-жөні жазылады. Екі жауынгер мүсінінің алдына қара қыз­ғалдақ бейнесі орналастырылмақ. Бұл қаралы қазаны білдіретін симво­ликалық композиция екенін аңғару көрер көзге таңсық емес.

Атырау облысының әкімі Б.Із­мұхамбетовпен болған кездесуде «Қазархстрой» жобалау-құрылыс компаниясының директоры және жоба авторы С.Бөкебай құрылысты жүргізуге 4-5 ай уақыт қажеттігін айтты.

Екі жауынгердің мүсіні Қарағанды қаласындағы арнайы мекемеде құйы­лып, Атырауға жеткізілетін болады. Сәулетшімен жүздесуде облыс әкімі Бақтықожа Ізмұхамбетов алдымен құрылыстың сапасына баса көңіл бөлу қажеттігін және мердігер мекеменің жауапкершілікті түсіне алатындай болуын тапсырды.

Ауған соғысы боздақтарына арнал­ған бұл ескерткіш шағын Жеңіс сая­бағы тұсындағы жаяу жүргіншілер кө­пі­рінің маңынан орнатылады. Ес­­керт­кіштің құрылысын Ауған со­ғысының аяқ­талғанына 25 жыл бо­луына орай 2014 жылдың 15 ақпанына дейін аяқтау жоспарланып отыр.