Жасанды интеллект медицина саласына батыл еніп жатыр. Бүгінде көптеген елде дәрігер қабылдауын жазып алатын, науқас шағымын саралайтын және медициналық құжаттарды автоматты түрде толтыратын AI-жүйелер қолданылады. Алайда Канадада жүргізілген жаңа аудит мұндай технологиялардың адам денсаулығына елеулі қауіп төндіруі мүмкін екенін көрсетті.
Канаданың Онтарио провинциясында тексерілген AI-хатшылар науқас пен дәрігер арасындағы әңгімені дұрыс түсінбей, кей жағдайда мүлде болмаған ақпаратты «ойдан шығарған». Бұл жүйелер бастапқыда дәрігерлердің жұмысын жеңілдету үшін енгізілгенімен, аудит нәтижесі олардың сенімділігіне үлкен күмән туғызды.
Тексеру барысында жасанды интеллект сервистерінің бірқатар өрескел қателік жібергені анықталды. Мысалы, кей бағдарламалар науқасқа қан талдауына немесе терапияға жалған жолдамалар жазып жіберген. Кейбір жағдайда дәрі атауларын шатастырып, тіпті науқастың психикалық жағдайына қатысты маңызды мәліметтерді мүлде елемей қалған.
Мамандар мұндай қателіктердің салдары өте ауыр болуы мүмкін екенін айтады. Өйткені медициналық құжаттағы бір ғана қате диагноздың кеш қойылуына, дұрыс ем тағайындалмауына немесе адамның денсаулығына тікелей зиян келуіне себеп болуы ықтимал.
Аудитке қатысқан 20 компанияның барлығында дәлдік пен ақпараттың толықтығына қатысты кемшіліктер табылған. Бұл жағдай AI жүйелерінің медицинада әлі толық қауіпсіз емес екенін көрсетеді.
Ең көп талқыланған мәселенің бірі – бұл сервистерді бағалау критерийлері болды. Белгілі болғандай, жүйенің дәлдігі жалпы бағаның небәрі 4 пайызын ғана құраған. Ал компанияның Онтарио аумағында орналасуы секілді факторларға 30 пайыздық салмақ берілген. Сарапшылар пікірінше, мұндай тәсіл технологияның сапасынан гөрі әкімшілік талаптарға көбірек мән берілгенін аңғартады.
Сыншылардың айтуынша, қазіргі таңда жасанды интеллект дәрігердің орнын толық баса алмайды. AI үлкен көлемдегі ақпаратты жылдам өңдей алғанымен, адамның эмоциясын, дауыс ырғағын, психологиялық күйін немесе астарлы мағынаны әрдайым дұрыс түсіне бермейді.
Соған қарамастан медицина саласында AI технологияларын қолдану тоқтамайды. Керісінше, көптеген мемлекет оны денсаулық сақтау жүйесіне белсенді енгізіп жатыр. Сондықтан мамандар мұндай жүйелерге қатаң бақылау, тәуелсіз аудит және нақты қауіпсіздік стандарттары қажет екенін алға тартады.
Бұл оқиға жасанды интеллекттің мүмкіндігі зор болғанымен, адам өміріне қатысты салада оның әрбір шешімі мұқият тексерілуі тиіс екенін тағы бір рет дәлелдеді.
