Былтыр қазақстандықтар ХҚКО арқылы 2,6 млн-нан астам құжат алған

2023 жылы қазақстандықтар Халыққа қызмет көрсету орталықтары арқылы 2,6 миллионнан астам төлқұжат пен жеке куәлік алған, деп хабарлайды El.kz ақпарат агенттігі.

Мұндай мәліметті «Азаматтарға арналған үкімет» мемлекеттік корпорациясы ұсынды. Ал 2022 жылы 2,3 миллион азаматқа жеке басын куәландыратын құжат берілген болатын.

Жалпы өткен төлқұжаттар мен жеке куәліктерді беру сұраныстағы үшінші мемлекеттік қызмет қатарынан табылған.

Астана мен Алматы қалаларында орнатылған құжаттама терминалдары арқылы соңғы бір жылда 19 мыңға жуық адам өтініш берген.

Терминалдар уақытты үнемдейді және бірнеше минут ішінде өтініш беруге мүмкіндік береді. Азаматтардың ыңғайлылығы біздің жұмысымыздың басымдығы және біз мемлекеттік қызметтерді көрсетуді одан әрі де жетілдіріп, әрбір қазақстандық үшін мүмкіндігінше тиімді және жедел болатындай етеміз, - деді «Азаматтарға арналған үкімет» мемлекеттік корпорациясы» КЕАҚ Басқарма Төрағасы Арман Кенжеғалиев.

Оқи отырыңыз: 

• Бұдан былай қандас мәртебесін алуға өтінішті ХҚКО қабылдамайды
• Жетісу облысында жаңа ХҚКО ашылды

Еске салсақ, 2024 жылы құжат алу үшін келесідей мемлекеттік баж алымы белгіленді: ҚР азаматының 36 парақты төлқұжаты үшін – 8 АЕК, 48 парақты төлқұжат үшін – 12 АЕК, 24 парақты төлқұжат үшін (16 жасқа дейінгі балаларға) - 4 АЕК. Жеке куәлік үшін төлем 0,2 АЕК-ті құрайды.