Қазақстандық жас шабуылшы Дастан Сәтпаев жарақатына байланысты «Бернли» сапынан уақытша кетіп, келісімшарты тиесілі «Челсиге» оралады. Футболшының қайта алаңға шығуы бірнеше аптаға созылуы мүмкін.
«Мидлсброға» қарсы кездесуде жарақат алды
Talk BFC порталының ақпаратына сәйкес, Сәтпаев жарақатынан кейін оңалтудан өту үшін Лондон клубына қайтады. Толық қалпына келген соң қазақстандық футболшы «Бернли» құрамына қайта қосылады.
Сәтпаев жарақатты 2 қыркүйекте өткен Чемпионшиптің төртінші турындағы «Бернли» мен «Мидлсбро» арасындағы ойында алған.
18 жастағы шабуылшы матчты негізгі құрамда бастап, шамамен 80 минут алаңда болды. Кездесу барысында ол «Бернлидің» ең белсенді ойыншыларының бірі атанып, матч соңында үздік футболшы деп танылды.
Алайда ойынның соңғы бөлігінде Сәтпаев жамбас тұсында жайсыздық сезініп, ауыстыруды сұрады. Кездесу 1:1 есебімен аяқталды.
«Бернли» бас бапкері Ники Хайен кейін қазақстандық футболшының бірнеше аптаға қатардан шығуы мүмкін екенін растады.
Сәтпаев «Челсиге» тұрақты түрде кеткен жоқ
Сәтпаевтың «Челсиге» оралуы оның «Бернлиден» тұрақты түрде кеткенін білдірмейді. Қазақстандық футболшының келісімшарты әлі де лондондық клубқа тиесілі.
2026 жылдың жазында «Челси» 18 жастағы Сәтпаевтың алматылық «Қайраттан» ауысуын ресми түрде рәсімдеді. Ағылшын клубы трансферден кейін футболшыны бірден 2026/27 маусымына «Бернлиге» жалға берді.
«Челси» Сәтпаевпен 2033 жылға дейін жарамды ұзақ мерзімді келісімшарт жасасты. Сондықтан жарақатынан айыққаннан кейін шабуылшы «Бернлиге» қайта барып, маусымды жалғастыруы тиіс.
Бұған дейін біз Дастан Сәтпаевтың ағылшын футболындағы айлығы туралы жазған едік.
