«ҚазМұнайГаз» АҚ 1,6 млрд теңгенің тендеріне қатысты түсінік берді

Telegram-каналдарда «ҚазМұнайГаз» ҰК АҚ үшін чартерлік рейстерді ұйымдастыру бойынша 1,6 млрд теңгеге мемлекеттік сатып алу конкурсы жарияланғаны туралы ақпарат тараған еді. Компания аталған конкурсқа қатысты түсінік берді, деп хабарлайды El.kz ақпарат агенттігі.

Компания мәліметіне сүйенсек, бұл 5 жылға жоспарланған және оның ақысы тек орындалған жұмыс бойынша төленеді. 

"ҚазМұнайГаз" тұрақты жолаушылар рейсі болмаған кезде төтенше жағдайларда, соның ішінде төтенше жағдайлар кезінде іскерлік және өндірістік мәселелерді жылдам шешу үшін чартерлік рейстерді пайдаланады. Көп жағдайда іссапарлар алдын ала жоспарланған және жоспарланған кезде компания Air Astana, SCAT, Qazaq Air және басқа да бірқатар әуе тасымалдаушыларының тұрақты рейстерінің қызметін пайдаланады, - деп хабарлады компаниядан.

Мәселен, 2022 жылдың көктемінде КҚК теңіз терминалында қазақстандық мұнайды жөнелтуде проблемалар басталып, «ҚазМұнайГаз» делегациясы шұғыл түрде Новороссийскіге ұшып кетті. Себебі ол жаққа тікелей рейс жоқ, екі-үш рет ұшақ ауыстыру керек. Чартерлік рейс осындай жағдайда пайдаланылады. Сондай проблемалық жағдайларда «ҚазМұнайГаз» мамандары өндіріс алаңдарына шұғыл жеткізіледі. Немесе жыл сайын жазда тұрақты әуе билеттеріне сұраныс артып, баға шарықтағанда «ҚазМұнайГаз» экологиялық жағдайы нашар батыс өңіріндегі жүздеген мұнайшының балаларын лагерьге демалуға апарады. Мұндай жағдайда чартерлік рейс қарапайым рейске қарағанда арзан түседі және билет тапшылық мәселесін шешуге септігін тигізеді.  

Ұлттық компания мына маңызды екі жайтты атап өтті. Біріншіден: тендерде көрсетілген 1,6 млрд теңге 2024-2028 жылдарға жоспарланған. Екіншіден: егер ұшу аз болса, оның қызметі үшін төленетін ақы да аз болады. Қарапайым тілмен айтқанда, бұл қаржы толығымен игерілмеуі де мүмкін.

Оқи отырыңыз: 

• Мемлекет басшысы Мағзұм Мырзағалиевті қабылдады
• Өткен жылы Ақтау портынан экспортқа 3 млн 376 мың тонна мұнай тасымалданды