Азия ойындары-2026: Қазақстан спортшылары қашан жарысқа шығады?

Жапонияда өтетін ХХ жазғы Азия ойындарының басталуына санаулы күн қалды. Аичи-Нагоя-2026 додасы 19 қыркүйек пен 4 қазан аралығында өтеді. Қазақстан құрамасы құрлықтың басты спорттық жарыстарының бірінде бірнеше спорт түрінен сынға түседі. Биылғы Азия ойындарының бағдарламасына 40-тан астам спорт түрі енгізілген. Қазақстандық спортшылардың жарыс күндері спорт түріне қарай әр кезеңге бөлінген.

Қазақстандықтар үшін алғашқы маңызды күн – 21 қыркүйек

Қазақстан құрамасы үшін алғашқы негізгі жарыстардың бірі бокстан басталады. Бокс бәсекелері 21 қыркүйекте өтеді.

Қазақстан сапында ерлер арасында Махмұд Сабырхан, Оразбек Асылқұлов, Төрехан Сабырхан, Сабыржан Аққалықов, Нұрбек Оралбай және Айбек Оралбай өнер көрсетеді.

Әйелдер құрамасында Алуа Балқыбекова, Назым Қызайбай, Виктория Графеева, Аида Әбікеева және Наталья Богданова бар.

22-27 қыркүйек – семсерлесу

Қазақстандық семсерлесушілер 22-27 қыркүйек аралығында жарыс жолына шығады.

Қазақстан барлық қару түрінен қатысады. Жекелей сында ел намысын Руслан Құрбанов, Кирилл Проходов, Ирина Бакалдина, Владислава Андреева, Артём Саркисян, Нұрмұхаммед Жайлыбай, Анастасия Гулик, Әйгерім Сарыбай және басқа спортшылар қорғайды.

Командалық жарыстарда да Қазақстан құрамалары өнер көрсетеді.

29 қыркүйек – велотрек

Қазақстандық велошабандоздар 29 қыркүйектен бастап тректегі жарыстарға қатысады.

Құрама сапында Әлішер Жұмахан, Максим Хорошавин, Ілья Карабутов, Дмитрий Носков, Рамис Дінмұхаметов, Андрей Чугай, Кирилл Курдиди, Дмитрий Резанов, Данияр Шаяхметов және Рината Сұлтанова бар.

30 қыркүйек – күрес бәсекелері басталады

Қазақстан үшін Азия ойындарындағы маңызды спорт түрлерінің бірі – күрес.

Бәсекелер 30 қыркүйекте басталады. Қазақстан еркін, грек-рим және әйелдер күресінен толыққанды құраммен қатысады.

Еркін күресте Нұрқожа Қайпанов, Азамат Дәулетбеков, Ризабек Айтмұхан және Едіге Қасымбек секілді балуандар өнер көрсетеді.

Грек-рим күресінде Демеу Жадыраев, Ислам Евлоев және басқа балуандар татамиге шығады. Әйелдер құрамында Жәмила Бақбергенова, Эльмира Сыздықова, Ирина Кузнецова және Нилуфар Раимова бар.

Веложарыс

Қазақстандық велоспортшылардың тағы бір маңызды старты – тасжолдағы жарыстар.

Ерлер арасындағы топтық жарыста Алексей Луценко, Евгений Фёдоров және Николя Винокуров өнер көрсетеді. Спортшылар 160 шақырымдық дистанциядан өтеді.

Алексей Луценко бұдан бөлек жекелей уақытқа жарыста Қазақстан атынан бақ сынайды.

Триатлон

Қазақстан триатлоннан жекелей жарыстарға ерлер және әйелдер санатында қатысады.

Әйелдер арасында Диана Ержанова мен Юлиана Петрова, ерлер арасында Аян Бейсенбаев пен Арлан Жанабай жарысады.

Қазақстандықтар аралас эстафетаға да қатысады. Бұл сында Егор Крупяков, Арлан Жанабай, Диана Ержанова және Аида Ким ел намысын қорғайды.

Ауыр атлетика

Қазақстанның ауыр атлетика құрамасы да Аичи-Нагоядағы жарыстарға қатысады.

Ерлер арасында Өтепберген Әлиев, Сайрамкез Ақмолда, Бексұлтан Айтбай, Алексей Чуркин және Нұрғиса Әділетұлы өнер көрсетеді.

Әйелдер арасында Екатерина Алякина, Арай Нұрлыбекова, Аянат Жұмағали, Айғаным Жанболат және Любовь Ковальчук ел намысын қорғайды.

Жаңа спорт түрі – падел

2026 жылғы Азия ойындарының ерекшеліктерінің бірі – паделдің бағдарламаға алғаш рет енгізілуі.

Қазақстан бұл спорт түрінен сегіз спортшымен қатысады. Ерлер арасында Евгений Данилов/Тимур Хабибулин және Родион Пак/Жақас Қозбақ жұптары, әйелдер арасында Альбина Хабибулина/Мария Синицына және Әйгерім Сүлеймен/Татьяна Гиоргазде жұптары өнер көрсетеді.

Жеңіл атлетика мен басқа спорт түрлері

Қазақстан құрамасы Азия ойындарында жеңіл атлетика, садақ ату, ат спорты, су спорты, дзюдо, таэквондо, гимнастика, ату спорты, командалық ойындар және басқа да бағыттарда өнер көрсетеді.

Мәселен, садақ атудан Қазақстан құрамасына 12 спортшы енген. Олар классикалық және блоктық садақ түрлерінен жарысады.

Ат спортынан Қазақстанды Олег Соколенко, Раиса Соколенко, Нұрила Тұрысбекова және Ксения Баталова таныстырады. Барлығы конкур бағдарламасына қатысады.

Командалық спорттарда да тартыс жоғары

Қазақстанның су добы бойынша ерлер құрамасы А тобында Таиланд, Жапония және Гонконг командаларымен кездеседі. Әйелдер құрамасы Қытай, Жапония, Сингапур, Таиланд және Өзбекстанмен ойнайды.

Ал әйелдер хоккейінде Қазақстан Қытай, Оңтүстік Корея, Малайзия, Қытай Тайбэйі және Бангладеш құрамаларымен бір топта орналасқан. Әйелдер турнирі 18 қыркүйек пен 2 қазан аралығында жоспарланған.

Қазақстан құрамасының негізгі күндері

19 қыркүйек – Азия ойындарының ашылу салтанаты.

21 қыркүйек – бокс басталады.

22–27 қыркүйек – семсерлесу.

29 қыркүйек – велотрек.

30 қыркүйек – күрес басталады.

4 қазан – Азия ойындарының жабылу салтанаты.

Қазақстан құрамасының нақты жекпе-жек, кездесу және старт уақыттары спорт түрлері бойынша жеребе мен ресми старт хаттамалары жарияланған сайын нақтыланады. Сондықтан жарыс күндері жақындаған сайын кестеге өзгерістер енгізілуі мүмкін.

Аичи-Нагоядағы Азия ойындарына 45 ел мен аймақтан 11 мыңнан астам спортшы қатысады. Жарыстар 16 күн бойы өтеді.