Бір қарағанда қарапайым темір тақтайша болып көрінетін көлік нөмірі жолдағы тәртіп пен қауіпсіздіктің маңызды құралы саналады. Алайда кейбір жүргізушілер заңнан жалтару үшін жалған нөмір қолдануға барады. Жақында өткен республикалық рейдтер барысында осындай 500-ден астам көлік анықталған, деп хабарлайды El.kz интернет порталы.
Жалған нөмір не үшін қолданылады?
Мемлекеттік тіркеу нөмірі – көліктің жеке куәлігі іспетті. Ол арқылы құқық қорғау органдары көлік иесін анықтап, жол қозғалысы ережелерінің сақталуын бақылайды. Ал жалған нөмір тағу немесе нөмірсіз жүру жүргізушінің жауапкершіліктен жалтаруға тырысатынын білдіреді.
Мамандардың айтуынша, жалған нөмірлер көбіне жылдамдықты бақылау камераларынан, ақылы жолдардан немесе басқа да автоматты бақылау жүйелерінен жалтару үшін пайдаланылады. Кей жағдайларда мұндай әрекеттер көліктің ізін жасыру немесе құқық бұзушылықтарды бүркемелеу мақсатында жасалады.
Заң бұзушыларға қандай жаза қарастырылған?
Рейд барысында жол қозғалысы ережелерін бұзудың 22 мыңнан астам дерегі тіркелді. Бұл туралы Polisia.kz мәлімдеді. Сонымен қатар 1,5 мыңнан астам көлік мемлекеттік тіркеу нөмірінсіз жүргені анықталды. Арнайы айып тұрағына шамамен 2,5 мың көлік қойылған.
Заң бойынша мемлекеттік тіркеу нөмірлерін қолдан жасау, өзгерту немесе жалған нөмірмен көлік басқару әкімшілік жауапкершілікке әкеледі. Кей жағдайда жүргізуші көлік құралын басқару құқығынан айырылуы мүмкін.
ІІМ Әкімшілік полиция комитетінің ерекше тапсырмалар жөніндегі аға инспекторы Арай Төлегенқызының айтуынша, бұл деректер жалған нөмірлердің заң бұзушылықтар үшін жауапкершіліктен жалтару мақсатында әдейі қолданылатынын көрсетеді.
Ішкі істер министрлігі «Заң және тәртіп» қағидатын жүйелі түрде жүзеге асырып келеді және кез келген құқық бұзушылыққа мүлдем төзбеушілік саясатын ұстанады. Әрбір заң бұзушылыққа тиісті құқықтық баға беріліп, кінәлі тұлғалар заң талаптарына сәйкес жауапкершілікке тартылады. Мұндай құқық бұзушылықтарды анықтау және жолын кесу жұмыстары тұрақты түрде жалғасады, – деді Арай Төлегенқызы.
Сарапшылар жолдағы қауіпсіздік тек полицияның жұмысына ғана емес, әр жүргізушінің жауапкершілігіне де байланысты екенін айтады. Өйткені көлік нөмірі – тәртіп пен қауіпсіздікті қамтамасыз ететін маңызды құралдардың бірі. Сондықтан жалған нөмір қолдану жеке құқық бұзушылық қана емес, қоғамдағы заңдылыққа төнген қауіп ретінде бағаланады.
