Microsoft Windows 11 операциялық жүйесін смартфонмен бұрынғыдан да тығыз байланыстыратын жаңа функцияларды әзірлеуде.
Компанияның мақсаты – компьютер мен телефон арасындағы шекараны барынша жойып, екі құрылғыны біртұтас экожүйе ретінде жұмыс істету. Бұл туралы Windows Central басылымы хабарлады.
Жаңартулардың бірі «Бастау» (Start) мәзіріндегі Phone Companion бөлімін қамтиды. Жаңа нұсқада пайдаланушылар Phone Link қолданбасын ашпай-ақ смартфондағы соңғы әрекеттерді көре алады. Мысалы, келген хабарламалар, фотосуреттер немесе басқа да соңғы оқиғалар бірден «Бастау» мәзірінде көрсетіледі.
Сондай-ақ хабарлама немесе суреттің үстіне курсорды апарғанда оның толық мазмұны ашылып, ақпаратты жылдам көруге мүмкіндік беріледі.
Телефонды Windows жүйесінен басқару жеңілдейді
Microsoft тағы бір жаңа мүмкіндікті – жүйелік науада (System Tray) смартфонды басқаруға арналған арнайы панельді сынақтан өткізіп жатыр.
Смартфон компьютерге қосылған кезде экранда телефон белгішесі пайда болады. Оны басқан кезде ықшам басқару терезесі ашылып, құрылғының күйі көрсетіледі. Осы жерден:
- «Мазаламаңыз» режимін қосуға немесе өшіруге;
- дыбыссыз немесе діріл режимін ауыстыруға;
- жоғалған телефонды іздеуді бастауға;
- басқа да жылдам функцияларды пайдалануға болады.
Сонымен қатар Microsoft файлдарды компьютерден телефон белгішесіне жай ғана сүйреп апару (drag-and-drop) арқылы смартфонға жіберу мүмкіндігін де әзірлеп жатыр.
Алмасу буфері толық синхрондалады
Қазіргі таңда Phone Link арқылы тек соңғы көшірілген мәтін немесе файл ғана синхрондалады. Ал жаңа жүйеде компьютер мен смартфон арасында алмасу буферінің толық тарихы сақталмақ.
Бұл дегеніміз – пайдаланушы жақында көшірген бірнеше мәтінді, сілтемені немесе басқа ақпаратты кез келген құрылғыдан қайта пайдалана алады. Мұндай мүмкіндік әсіресе жұмыс барысында жиі мәтін көшіріп, бірнеше құрылғыны қатар қолданатын адамдар үшін қолайлы болмақ.
SMS-хабарламаларға жеке қосымша
Microsoft Windows 11 үшін «Хабарламалар» (Messages) атты жеке қосымша әзірлеп жатыр.
Жаңа бағдарлама смартфондағы SMS-хабарламаларды компьютермен синхрондап, пайдаланушыларға:
- келген хабарламаларды оқуға;
- оларға жауап беруге;
- жаңа SMS жіберуге мүмкіндік береді.
Қазіргі уақытта мұндай мүмкіндік Phone Link қолданбасының ішінде ғана қолжетімді. Ал жаңа нұсқада ол бөлек бағдарлама ретінде жұмыс істеп, оны «Бастау» мәзіріне немесе тапсырмалар тақтасына бекітуге болады.
Смартфон компьютердің жалғасына айналада
Бұл бағыттағы жұмыстар Microsoft үшін жаңалық емес. Бұған дейін компания Phone Link мүмкіндіктерінің бір бөлігін Windows 11 жүйесіне енгізе бастаған еді. Қазір пайдаланушылар «Файлдар зерттеушісі» (File Explorer) арқылы смартфондағы файлдар мен фотосуреттерді аша алады. Сонымен бірге телефон камерасын компьютерге арналған веб-камера ретінде пайдалану мүмкіндігі де бар.
«Хабарламалар» (Messages) қосымшасының макеті. Сурет: Windows Central.
Жаңартулар қашан басталады?
Windows Central мәліметінше, аталған мүмкіндіктердің барлығы әзірге ішкі тестілеу және прототиптеу кезеңінде. Сондықтан олардың Windows 11-дің соңғы нұсқасына міндетті түрде енгізілетіні әзірге белгісіз. Алдымен Microsoft оларды Windows Insider бағдарламасына қатысушылар арасында сынақтан өткізіп, пайдаланушылардың пікірін жинауы ықтимал.
Дегенмен компанияның қазіргі бағыты анық: Microsoft смартфон мен компьютерді жеке құрылғылар ретінде емес, бір-бірін толықтыратын бірыңғай экожүйе ретінде дамытуға басымдық беріп отыр. Егер жаңа функциялар толық іске қосылса, Windows 11 пайдаланушылары смартфонды қолына алмай-ақ көптеген күнделікті әрекетті компьютерден орындауға мүмкіндік алады.
