Василий Левит Астанада жаңа спорт орталығы ашылғанын мәлімдеді

Елодада 1 наурыздан бастап, бочча орталығы ашылды. Бұл туралы Астана қаласы Дене шынықтыру және спорт басқармасының басшысы Василий Левит паралимпиадалық спорт түрі боччадан Сұлтанбек Орынбасаровты еске алуға арналған ашық турнирінің ашылу салтанатында мәлімдеді, деп хабарлайды El.kz ақпарат агенттігі елорда әкімдігінің ресми сайты.

3 күнге жалғасатын бәсекеде еліміздің 10 өңірінен 70-ке жуық спортшы жасөспірім және ересектер санаты бойынша жүлде жиынтығын сарапқа салады.

Осы орайда турнирдің басты фавориттерінің бірі болған елордалық Итиана Шыңғысханқызы өз ойымен бөлісті.

Бочча ойынының ережесі өте қарапайым. Ойын алаңында ақ доп тұрады. Мақсат — доптарды барынша ақ доптың қасына жинау. Бары осы! Бастапқыда доп лақтыруымен айналысқым келмей, анамның айтқанына қарсы болдым. Бірақ секцияға келгенде бұл менің спортым екенін түсіндім. Қазіргі уақытта 2023 жылы өткен Қазақстан кубогының чемпионымын. Бұл жарысты дайындық ретінде есептеймін. Ең ірі турнирім — 2023 жылы Ханчжоудағы Пара Азия ойындары. Алғашқы ойында Иран өкілі Зариеф Ахмадиді 8:4 жеңгеніммен, келесі кездесуде 3 дүркін Паралимпиада чемпионы Лэм Яенг Яу мен Бейжің Паралимпиадасының қатысушысы Хой Инг Карен Квокке (Гонконг) есе жібердім. Бұл мен үшін өте үлкен сабақ болды. Алдағы уақытта қателіктеріммен жұмыс істеудемін, - деді Итиана Шыңғысханқызы.

Итиананың айтуынша, ел ішінде оның жоғары жетістікке жетуіне басқа спорт түрімен де айналысуы көмектесіпті.

Бұған дейін үйде жүгірдім. Артынша жүзуге бардым. Мұның барлығы арқамды дұрыстап, физикалық күйімнің күшеюіне әсер етті. Шыдамдылық және дұрыс стратегия таңдай білу боччадағы жеңістің басты кілті, - деді қайсар спортшы қыз.

Ұйымдастырушылардың сөзінше, боччаға қызығушылық уақыт өткен сайын артуда. Желтоқсан айында ұйымдастырылған Қазақстан кубогында 53 спортшы қатысса, осы турнирде олардың қатары 70-ке дейін өскен.

Қысқа да нұсқа. Жазылыңыз telegram - ға