Түркияда зілзаладан көз жұмғандар саны 14 мыңнан асты

Түркияда жойқын зілзаладан қаза болғандар саны 14 мыңнан асты, тағы 63 мың 794 адам жараланған, деп хабарлайды El.kz ақпараттық агенттігі Түркияның Анадолы агенттігіне сілтеме жасап.

Бұл туралы Түркия Президенті Режеп Тайип Ердоған Газиантеп қаласында айтты.

«Жер сілкінісінен кейін біз мемлекет ретінде барлық институттарымызбен бірге оқиға орнына келдік. Біздің мақсатымыз – 1 жыл ішінде қираған ғимараттардың орнына 2-3-4 қабатты үйлер салу. Өкінішке орай, процесті саяси пайдаға айналдыратындар бар. Менің азаматым, менің халқым бұл қорлауды ешқашан ермейді. Бір жағынан бізде контейнерлік жұмыстар бар, екінші жағынан шетелден келетін контейнерлер бар», - деді Түркия Президенті.

Сонымен бірге, бүгін Түркия Парламентінде дауыс беру арқылы төтенше жағдай күшіне енеді.

«Бұл мемлекетке Түркияда процесті пайдаланғысы келетін және саудадағы сыбайлас жемқорлыққа әкелетін барлық өсімқорлар мен арандатушы топтарға қарсы күресуге мүмкіндік береді», - деді Р. Т. Ердоған.

Айта кетейік, осыған дейін Түркияда жер сілкінісінен қаза болғандар саны 12 391 адамға жеткендігін хабарлаған болатынбыз.

Түркиядағы жер сілкінісінен кейін хабарсыз кеткен Сабина Мамадьярова аман табылды. Бұған дейін Түркияның оңтүстік-шығысындағы жер сілкінісінен кейін бірнеше қазақстандықтың хабарсыз кеткені туралы жазған едік.

Қазақстандық құтқарушылардың екінші эшелоны Түркияның Газиантеп қаласына жетті. Қазіргі уақытта жабдықтар мен жеке құрамды түсіру жұмыстары жүргізілуде. Қазақстан Түркияға гуманитарлық көмек ретінде $1 млн бөлді. Сонымен қатар бүгін Қазақстандықтардың екінші тобы Түркиядан қайтарылды.

Қысқа да нұсқа. Жазылыңыз telegram - ға