Түркияда есірткіге қарсы рейд кезінде 14 танымал актер мен әнші ұсталды. Операция Ыстанбұлдағы түнгі клубтар мен қонақ үйлерде жүргізілген, деп хабарлайды El.kz.
Түркиядағы шоу-бизнес өкілдеріне қатысты есірткіге қарсы рейдтер соңғы айларда жиілеп кетті. Бұл жолы операция аясында танымал актерлер мен әншілердің аты аталып, қоғамда үлкен резонанс тудырды.
Операция «Таң» деп аталады
Түркия билігі мұндай рейдтерді былтыр қазан айынан бері тұрақты өткізіп келеді. Сарапшылар «Таң» деп аталған операцияны елдегі есірткі айналымына қарсы күрестің күшеюімен байланыстырады. Соңғы жылдары Түркия тек туризм мен кино индустриясының орталығы емес, Еуропа мен Таяу Шығыс арасындағы маңызды транзиттік аймаққа айналды. Соған байланысты құқық қорғау органдары қоғамда ықпалы бар тұлғаларды да жіті бақылауға алған.
Бұл рейдтердің ерекшелігі - тек күдіктілерді ұстаумен шектелмей, түнгі клубтар, қонақүйлер, көңіл көтеру орындары толық тексеріледі. Яғни мәселе жеке адамдарда ғана емес, белгілі бір орта мен индустрияға қатысты қарастырылып отыр. Түркия прокуратурасы биологиялық сараптама, тінту және жауап алу шараларын қатар жүргізіп жатыр.
Ұсталғандар кім?
Көпшілік арасында «неге дәл актерлер мен әншілер?» деген сұрақ туындауы мүмкін. Мамандардың айтуынша, шоу-бизнес өкілдері түнгі өмірге, жабық кештерге және түрлі элиталық ортаға жиі қатысады. Сондықтан мұндай тексерулерде олардың аты жиі аталады. Бірақ бұл олардың бәрі кінәлі деген сөз емес. Түркия заңнамасында адам тек сот шешімі шыққаннан кейін ғана ресми түрде айыпты деп танылады.
Мысалы, актер Жан Яман өзіне тағылған күдікті жоққа шығарды. Ал Доғукан Гүңгер кейбір «жеңіл заттарды» қолданғанын мойындап, жанкүйерлерінен кешірім сұрады. Бұл жерде Түркия мен Еуропадағы заң айырмашылығы да талқыланып жатыр. Кейбір Еуропа елдерінде рұқсат етілген заттар Түркияда қылмыс болып саналады.
Тағы бір назар аударатын мәселе - әлеуметтік желі мен сериал жұлдыздарының қоғамға ықпалы. Түркияда актерлер тек өнер адамы емес, миллиондаған адамның кумирі. Сондықтан олардың аты мұндай дауға ілінсе, бұл жастарға әсер етеді деген алаңдаушылық бар. Сол себепті Түркия билігі танымал адамдарға қатысты істерді қоғамға ашық көрсетіп, алдын алу шарасы ретінде пайдалануға тырысады.
Бұл жолғы рейд нәтижесінде «Мүкжидек шәрбаты» сериалының актрисасы Фейза Живелек пен танымал әнші Мабель Матиз де ұсталды.
Басқа бір тергеу аясында дәлелдер алынды. Соның негізінде Ыстанбұл жандармериясына 25 күдіктіні ұстау, тінту жүргізу, биологиялық сараптама жасау және жауап алу туралы нұсқау берілді, - делінген Ыстанбұлдың Бакыркөй аудандық Бас прокуратурасының мәлімдемесінде.
NTV телеарнасының мәліметінше, барлығы 14 адам ұсталған. Олардың қатарында Medcezir сериалының актрисасы әрі модель Серенай Сарыкая, актер Онур Туна, әнші Беркай және өзге де жұлдыздар бар.
Мабель Матиз бұған дейін әдепсіз материал тарату ісі бойынша да айыпталған. Ән мәтініне байланысты оған үш жылға дейін бас бостандығынан айырылу қаупі төнген еді. Алайда мамыр айының басында сот оны ақтап шықты. Әншінің Spotify платформасында ай сайын 5,5 миллион тыңдарманы бар. Ол Түркия мен Еуропада тұрақты түрде концерт береді.
