Қазақстанда жаңа пәтер іздеген адам ең алдымен «эконом», «комфорт», «комфорт+», «бизнес» немесе «элит» деген атауларға тап болады. Құрылыс компаниялары тұрғын үй кешендерін түрлі санатқа бөліп ұсынғанымен, олардың арасындағы айырмашылықты бәрі бірдей түсіне бермейді. El.kz интернет порталы шолу жасап көрді.
Қазақстанда баспана сатып алғысы келетін азаматтардың алдында ең алдымен бір сұрақ туындайды: эконом-класс таңдау керек пе, әлде комфорт немесе бизнес-класс па? Құрылыс компаниялары тұрғын үй кешендерін түрлі санаттарға бөліп жарнамалайды. Алайда көп жағдайда сатып алушылар бұл атаулардың нақты нені білдіретінін, олардың арасындағы айырмашылық қандай екенін біле бермейді.
Қазақстанда тұрғын үйлер қалай жіктеледі?
Қазіргі нарықта тұрғын үйлер негізінен эконом, комфорт, комфорт+, бизнес және элит санаттарына бөлінеді. Алайда бұл атаулардың барлығы бірдей заңнамамен қатаң реттелмейді. Сондықтан әр құрылыс компаниясы өз жобасын жоғары санатқа жатқызып көрсетуге тырысуы мүмкін.
Дегенмен нарықта қалыптасқан белгілі бір өлшемдер бар.
Эконом-класс: қолжетімді баспана
Эконом-класс тұрғын үйлер ең алдымен бағаның қолжетімділігімен ерекшеленеді. Мұндай үйлерде:
- төбе биіктігі әдетте 2,5-2,7 метр болады;
- пәтерлердің ауданы шағын келеді;
- кіреберіс пен холлдардың әрлеуі қарапайым;
- ауланы абаттандыру деңгейі төмен болуы мүмкін;
- жерасты паркингі қарастырылмайды;
- құрылыс материалдары стандартты деңгейде пайдаланылады.
Бұл санаттағы үйлердің басты артықшылығы – бағасының төмендігі. Әсіресе алғашқы баспанасын сатып алып жатқан жастар мен ипотекаға тәуелді отбасылар арасында сұраныс жоғары.
Комфорт-класс: нарықтағы ең танымал сегмент
Соңғы жылдары Қазақстанда ең көп салынатын және сатылатын тұрғын үйлер комфорт-класс санатына жатады. Олардың ерекшеліктері:
- жабық немесе қауіпсіз аула;
- балалар және спорт алаңдары;
- бейнебақылау жүйесі;
- заманауи лифттер;
- кең кіреберістер;
- көгалдандырылған аумақ;
- инфрақұрылымы дамыған аудандарда орналасуы.
Комфорт-класс тұрғын үйлер қазіргі орта таптың сұранысына бейімделген өнім саналады. Бағасы эконом-класстан жоғары болғанымен, жайлылық деңгейі де айтарлықтай жақсы.
Комфорт+ деген не?
Қазақстандық нарықта соңғы жылдары кең тараған санаттың бірі – комфорт+.
Бұл ресми түрде бекітілген класс емес, құрылыс компаниялары енгізген аралық сегмент. Комфорт+ үйлерінде:
- төбе биіктігі 3 метрге дейін жетеді;
- дизайнерлік холлдар болады;
- электронды құлыптар орнатылады;
- Face ID немесе смарт технологиялар қолданылады;
- жерасты паркингі қарастырылады;
- шу оқшаулауы күшейтіледі;
- тұрғындардың тығыздығы төмен болады.
Көп жағдайда бүгінгі нарықтағы жаңа жобалардың басым бөлігі дәл осы комфорт+ санатына жатқызылады.
Бизнес-класс тұрғын үйдің ерекшелігі қандай?
Бизнес-класс тек сапалы құрылыс емес, тұрғындарға жоғары деңгейдегі өмір сүру ортасын ұсынуды көздейді. Мұндай үйлерде:
- қаладағы беделді аудандар таңдалады;
- тұрғындар саны салыстырмалы түрде аз болады;
- жоғары сапалы құрылыс материалдары қолданылады;
- үлкен терезелер мен кең жоспарлы пәтерлер салынады;
- бірнеше деңгейлі қауіпсіздік жүйесі енгізіледі;
- тәулік бойы күзет ұйымдастырылады;
- жерасты паркингі міндетті элементтердің бірі саналады;
- ландшафтық дизайн ерекше жасалады.
Бұл санаттағы сатып алушылар үшін үй тек баспана емес, белгілі бір өмір салтының көрсеткіші ретінде қарастырылады.
Элит тұрғын үй дегеніміз не?
Элит немесе премиум-класс тұрғын үйлер ең жоғары санатқа жатады. Олардың басты ерекшеліктері:
- қаланың орталық бөлігінде орналасуы;
- бір қабатта аз пәтер болуы;
- жеке сервис қызметтері;
- ерекше архитектуралық шешімдер;
- премиум деңгейдегі материалдар;
- жеке фитнес залдары немесе лаундж аймақтарының болуы.
Мұндай тұрғын үйлердің бағасы көбіне орналасқан жеріне, брендтік жобасына және эксклюзивтілігіне байланысты қалыптасады.
