Toyota АҚШ-та 508,3 мыңнан астам гибрид Camry көлігін кері қайтару науқанын бастады. Бұған көліктің аспаптар панеліндегі ақау себеп болған. Ақау жүргізуші үшін маңызды ескертулердің экранда көрсетілмеуіне әкелуі мүмкін. Бұл туралы Reuters АҚШ-тың Ұлттық жол қозғалысы қауіпсіздігі басқармасына (NHTSA) сілтеме жасап хабарлады.
Қандай ақау анықталды?
Кері қайтару 2025-2026 жылдары шығарылған кейбір Toyota Camry Hybrid көліктеріне қатысты.
Көлікті іске қосқан кезде аспаптар панелінің дисплейі дұрыс жұмыс істемеуі мүмкін. Соның салдарынан жүргізушіге қажет бірнеше маңызды белгі экранда көрсетілмей қалуы ықтимал. Олардың қатарында:
- апаттық сигнализация индикаторы;
- бұрылыс көрсеткіштері;
- қауіпсіздік белдігін тақпағаны туралы ескерту;
- Smart Key кілті туралы ескерту бар.
NHTSA мәліметінше, мұндай ақау жол-көлік оқиғасы немесе жарақат алу қаупін арттыруы мүмкін.
Ақау қалай түзетіледі?
Мәселе аспаптар панелінің бағдарламалық жасақтамасына байланысты болып отыр. Сондықтан көлік иелеріне жөндеу жұмыстары үшін ақы төлеудің қажеті жоқ.
Toyota дилерлері кері қайтаруға кіретін көліктердің дисплей бағдарламалық жасақтамасын тегін жаңартады.
Қазіргі таңда жарияланған ақпарат кері қайтару науқанының АҚШ нарығына арналған көліктерге қатысты екенін көрсетеді.
Қазақстандағы Camry иелері не істеуі керек?
Әзірге бұл науқанның Қазақстанда сатылған Toyota Camry көліктеріне қатысы бар-жоғы нақтыланбаған.
Дегенмен АҚШ нарығына арналған Camry көлігін мінетін қазақстандық жүргізушілер өз көлігінің кері қайтару тізіміне кіретін-кірмейтінін тексергені жөн.
Ақау бағдарламалық жасақтамаға байланысты болғандықтан, мәселені уақтылы анықтап, бағдарламаны жаңарту жүргізуші мен жолаушылардың қауіпсіздігі үшін маңызды.
