Шетелде жүріп ел мерейін үстем етіп жүрген қазақ жастарының қатары артып келеді. Соның бірі – Санжар Әбішев. Жас қазақ жігітінің Ұлыбритания астанасы Лондондағы беделді аудандардың бірі – St. James ауданының мэрі болып сайлануы әлеуметтік желіде қызу талқыланып, қазақстандықтарды қуантты.
Небәрі 33 жастағы Санжардың бұл жетістігі көпшілік үшін үлкен мақтанышқа айналды. Өйткені ол әлемдегі ең ықпалды қалалардың бірінде қоғамдық басқару ісіне араласып, жергілікті билік құрылымында маңызды қызмет атқармақ.
St. James – Лондонның тарихи әрі беделді ауданы
St. James ауданы Лондонның орталығында орналасқан, тарихи маңызы жоғары аймақтардың бірі саналады. Бұл жерде Ұлыбританияның саяси, мәдени және іскерлік элитасы шоғырланған. Ауданның ерекшелігі – корольдік сарайларға, үкіметтік мекемелерге және әйгілі клубтар мен тарихи ғимараттарға жақын орналасуында.
Санжар Әбішев консервативті партия өкілі ретінде, бас бәсекелес лейбористерден 350 дауысқа озып шығып, ауданның мэрі атанды. Жалпы дауыс беруге 2,3 мың адам қатысқан.
Қуанышты жаңалықты әлеуметтік желіде танымал қазақстандық кәсіпкер, Kusto Group компаниясының тең құрылтайшысы Қанат Көпбаев бөлісті.
Қазақ отбасынан шыққан, британ элитасында туысы да, байланысы да жоқ жігіт білімнің, тәртіптің және көпжылдық еңбектің арқасында Лондонның беделді ауданының мэрі атанды. Бұл оның үлкен жолының бастамасы ғана деп сенемін, – деп атап өтті Қанат Көпбаев.
Осындай маңызды аймақтың мэрі атану – үлкен жауапкершілік пен сенімнің белгісі.
Санжар Әбішев кім?
Санжар Әбішев – қазақстандық кәсіпкер Азат Әбішевтің ұлы. Ол білімін Ұлыбританияда алып, Лондондағы беделді оқу орындарының бірінде оқыған.
Алдымен Санжар әйгілі Malvern College мектебін тәмамдаған. Бұл оқу орны Ұлыбританиядағы ең танымал жекеменшік колледждердің бірі ретінде белгілі. Мұнда кезінде саясаткерлер, ғалымдар, қоғам қайраткерлері мен бизнес өкілдері білім алған.
Колледжден кейін ол жоғары оқу орнын аяқтап, қоғамдық және әкімшілік қызметке бет бұрған. 2016 жылдан бері өзінің Blue Swallow Group маркетинг агенттігін басқарады. Компания әлемдік ірі брендтермен жұмыс істейді. 2015 жылы әлеуметтік жобаларды қолдауға бағытталған ұйым құрған. Жас саясаткердің жергілікті басқару жүйесіндегі белсенділігі мен бастамалары оның Westminster City Council құрамына енуіне жол ашты.
Westminster City Council құрамындағы қызметі
Westminster City Council – Лондонның орталық бөлігін басқаратын негізгі атқарушы органдардың бірі. Бұл құрылым қаладағы инфрақұрылым, тұрғын үй, көлік, мәдениет, экология және қоғамдық қауіпсіздік мәселелерімен айналысады.
Санжар Әбішев – консервативтік партияның белсенді мүшесі. 2024 жылы Сент-Джеймс партиялық округінің төрағасы қызметіне тағайындалған. Ал 2022 жылдан бастап қоғамдық жұмыстарға белсенді араласып, тұрғындармен кездесулер өткізіп келген. Осы орган құрамына енуі оның британ қоғамындағы белсенді азаматтық ұстанымын көрсетеді. Сонымен қатар бұл – қазақ жастарының халықаралық деңгейде де бәсекеге қабілетті екенін дәлелдейтін оқиғалардың бірі.
Азат Әбішев кім?
Санжардың әкесі Азат Әбішев – кәсіпкерлік саласында танылған азаматтардың бірі. Ол Қазақстандағы бизнес ортасында белгілі тұлға ретінде аталады. Әлеуметтік желі қолданушылары Санжардың жетістігін оның отбасының білім мен тәрбиеге ерекше көңіл бөлуімен де байланыстырып жатыр.
Әлеуметтік желідегі реакция
Санжар Әбішевтің мэр болып сайланғаны туралы ақпарат тарағаннан кейін әлеуметтік желіде көптеген жылы пікірлер жазылды.
Желі қолданушылар:
- Қазақ жастары әлемді мойындатып жүр,
- Шетелде жүріп елдің атын шығару – үлкен мәртебе,
- Осындай жастар көбейе берсін, - деген тілектерін білдірді.
Санжар Әбішевтің жетістігі – тек жеке жеңіс емес, ол қазақ жастарының білім арқылы әлемдік деңгейде биік орындарға жете алатынын көрсететін мысал. Шетелде білім алып, халықаралық ортада өз орнын табу бүгінде жаңа буын үшін маңызды бағыттардың біріне айналып отыр. Лондондағы тарихи ауданның мэрі атанған қазақ жігітінің оқиғасы көптеген жасқа мотивация берері сөзсіз.
