Жаңалықтар

Тұрмыстық зорлық-зомбылық жасаған 3500-ге жуық адам полиция бөліміне жеткізілді

Бұл туралы Polisia.kz сайтында жарияланды 
Тұрмыстық зорлық-зомбылық жасаған 3500-ге жуық адам полиция бөліміне жеткізілді
Фото: polisia.kz 17.10.2022 09:50 1512

Түркістан облысында жыл басынан бері тұрмыстық зорлық-зомбылық жасаған 3500-ге жуық адам полиция бөліміне жеткізілген, – деп хабарлайды El.kz Polisia.kz сайтына сілтеме жасап.

Түркістан облысы әкімі жанындағы әйелдер істері және отбасылық-демографиялық саясат жөніндегі комиссияның кезекті отырысы өтті. Онда балалар мен әйелдердің денсаулығын, өмірін қорғау туралы мәселелер қозғалды. Ал отбасы-тұрмыстық қатынастар саласындағы қылмыстар бойынша Түркістан облысы ПД-ның Жергілікті полиция қызметі басқармасының әйелдерді зорлық-зомбылықтан қорғау тобының аға инспекторы Жанар Қалабаева баяндама жасады.

– Полиция департаментінің құрылымдарымен әйелдер мен балаларға қатысты тұрмыстық зорлық-зомбылықтың алдын алу мақсатында облыс көлемінде «Құқықтық тәртіп» «Тұрмыс», «Жасөспірім», «Түнгі қаладағы балалар» жедел-профилактикалық іс-шарасы мен «Зорлық-зомбылықсыз отбасы», «Отбасындағы зорлық-зомбылыққа жоқ!» және «Отбасындағы бейбітшілік» атты акциялары ұйымдастырылды. Жалпы, осы жылдың 9 ай мерзімінде тұрмыста жасалған құқық бұзушылықтар бойынша азаматтардан келіп түскен арыз-шағымдар негізінде әкімшілік жауапкершілікке тарту үшін сотқа 2326 іс құжаттар жолданып, оның ішінде 64 пайызы екі жақтың татуласуына байланысты қысқартылды. Облыс бойынша 3500-ге жуық тұрмыстық зорлық-зомбылық жасаған адам ішкі істер органдарына жеткізілді. Барлығы 3412 қорғау нұсқамасы шығарылды. Тіркелген қылмыстарды сараптау барысында мамандар отбасындағы жанжалдың орын алуына көп жағдайда ішімдік себеп болады, – деп атап өтті ол. 

Жиын соңында полицейлер тарапынан әйелдерді зорлық-зомбылықтан қорғау бағытындағы жұмыстар одан әрі жалғасатыны айтылды.

Бөлісу:
Telegram Қысқа да нұсқа. Жазылыңыз telegram - ға