Алматы көшесінде бір қолына сәбиін көтеріп, арқасына курьерлік сөмке асынған әйелдің фотосы әлеуметтік желіде қызу талқыға түсті. Мыңдаған адам оның тағдырына алаңдап, іздеуге кіріскен болса, енді бірі көмек көрсетуге ниет білдірді, деп хабарлайды El.kz интернет порталы.
Көп ұзамай қоғамды толқытқан жас ана табылып, оның баласын құшағына алып жұмыс істеуіне не себеп болғаны белгілі болды. Бұл оқиға жалғыз бір отбасының мәселесін ғана емес, күнкөріс қамымен күресіп жүрген мыңдаған қазақстандық ананың жағдайын көрсеткендей.
Оқиға қалай басталды?
Курьер ананың фотосын Threads әлеуметтік желісінде блогер Sasha Wu’style жариялаған. Оның айтуынша, әйелді Алматыдағы Брусиловский көшесінде кездестірген. Суретте жас ана сәбиін құшағына қысып, жұмысқа асығып бара жатқан сәті түсіп қалған.
Блогер кейінірек сол кезде әйелге көмектесе алмағанына өкініш білдіріп, жазба қалдырған. Көп ұзамай сурет мыңдаған қолданушының назарына ілігіп, адамдар әйелді іздеуге кірісті.
Желі қолданушылары не деді?
Әлеуметтік желіде пікір қалдырғандардың басым бөлігі жас ананың жағдайына алаңдаушылық білдірді. Кейбірі оған қаржылай көмек көрсетуге дайын екенін жазса, енді бірі баламен бірге жұмыс істеуге мәжбүр болған аналардың мәселесін көтерді.
Алайда көпшіліктің жанашырлығын алаяқтар да пайдалануға тырысқан. Белгісіз адамдар әйелдің атынан ақша жинай бастап, оның суретін жасанды интеллект арқылы өңдеп, түрлі платформаларда көмек сұраған жалған жазбалар жариялаған.
Анаға бір күндік табысын берген
Бірнеше күнге созылған іздеуден кейін жас ананы алматылық тұрғын Алмат Несіпқалиев тауып алған.
Мейрамхана қызметкері Алмат алғашында әйелдің қолындағы нәрестенің шынайы сәби екеніне күмәнданғанын айтады. Кейін жақындап сөйлескенде баланың небәрі 3-4 айлық екенін білген.
Әйелдің айтуынша, жолдасының табысы отбасының барлық шығынын жабуға жетпейді. Сондықтан ол сәбиін қасына алып, курьер болып жұмыс істеуге мәжбүр болған.
Алмат Несіпқалиев бұл кездесуді видеоға түсіріп, әлеуметтік желіде жариялады. Ол жас анаға өзінің бір күндік табысын беріп, үйіне барып демалуын өтінген. Сондай-ақ қоғамды мұндай жағдайларға бейжай қарамауға шақырды.
Бір жасқа дейінгі балаға қандай көмек көрсетіледі?
Курьер ананың оқиғасы қоғамда жас баласы бар отбасылардың әлеуметтік жағдайы туралы пікірталасты қайта жандандырды. Қазақстанда сәби дүниеге келгеннен кейін ата-аналарға бірқатар мемлекеттік қолдау шарасы қарастырылған.
Ең алдымен, бала туған кезде отбасыға біржолғы мемлекеттік жәрдемақы төленеді. Бұл төлем барлық аналарға беріледі. Мөлшері баланың туу кезегіне байланысты өзгереді:
- 2, 3-балаға – шамамен 38 АЕК;
- 4 және одан кейінгі балаларға – шамамен 63 АЕК.
Бұдан бөлек, бала бір жасқа толғанға дейін оны күтіп-бағуға арналған ай сайынғы төлем беріледі. Егер ана ресми түрде жұмыс істеп, әлеуметтік аударымдар жасап жүрген болса, ол Мемлекеттік әлеуметтік сақтандыру қорынан табысынан айырылуына байланысты әлеуметтік төлем алуға құқылы. Ал жұмыс істемейтін аналарға бюджет есебінен бала күтімі бойынша жәрдемақы төленеді.
Сондай-ақ табысы төмен отбасылар атаулы әлеуметтік көмекке өтініш бере алады. Кейбір жағдайда жергілікті әкімдіктер тұрғын үй көмегі мен басқа да әлеуметтік қолдау түрлерін ұсынады.
Дегенмен мамандар мемлекеттік төлемдер отбасының барлық шығынын толық өтей бермейтінін айтады. Сондықтан күнкөріс қамымен баласын қасына алып жұмыс істеуге мәжбүр болатын ата-аналар да кездеседі. Алматыдағы курьер ананың оқиғасы осы мәселенің қоғам үшін әлі де өзекті екенін көрсетті.
