Махаббат үшін адам баласы небір ерліктер мен ақылға сыйымсыз қадамдарға барады. Алайда, ресейлік танымал руферлер – 33 жастағы Ангела Николау мен 32 жастағы Иван Биркус (Кузнецов) өз сезімдерін дәлелдеу үшін әлемнің ең танымал ғимараттарының бірі, Нью-Йорктегі Empire State Building аспан тірегенінің ең ұшына (шпиліне) көтерілді. Бұл жай ғана кезекті трюк емес, аспан мен жердің арасында жасалған ерекше ұсыныс пен үлкен әлеуметтік үндеу еді.
Аспан тірегеннің ұшындағы махаббат пен бейбітшілік үндеуі
Жұп биіктігі 443 метр болатын ғимараттың ең шыңына шығып, кем дегенде 10 минут уақыт өткізген. Олар бұл жерде тек сезімдерін білдіріп қоймай, әлемдік маңызы бар ұран тастады. Руферлер шың басында тұрып «Махаббаттың күші билікке деген құштарлықты жеңген кезде, әлемде бейбітшілік болады» деген жазуы бар үлкен баннерді жайып жіберді. Осыдан кейін Иван дәстүрлі түрде бір тізесіне бүгіліп, Ангелаға неке жүзігін ұсынды. Төбедегі техникалық камералар мен әлеуметтік желідегі тікелей эфирлер бұл сәтті, яғни қыздың маскасын шешіп, жігітті құшақтап, сүйген сәтін анық таспалады.
Empire State Building әлемдегі ең қатаң күзетілетін нысандардың бірі екенін айта кетейік. Алдын ала мәлімет бойынша, экстримді ұнататын жұп ғимараттың келушілер үшін ашық 102-қабатынан күзетке байқатпай, техникалық қызмет көрсетуге арналған 103-қабатқа өтіп кеткен. Одан әрі қарай арнайы люк арқылы ғимараттың ең ұшар басындағы ине тәріздес шпильге көтерілген.
Ғимарат әкімшілігі бұл әрекеттің төмендегі бақылау алаңында тұрған туристер мен тұрғындардың өміріне ешқандай қауіп төндірмегенін айтты. Оған қоса, әкімшілік өкілі сәл әзіл араластырып «Empire State Building – әлемдегі ең романтикалық орын және мұнда заңды түрде сезім білдіруге тамаша мүмкіндіктер бар» деп бұл әрекеттің заңсыз болғанын баса айтты.
Посмотреть эту публикацию в Instagram
«Skywalkers»: Netflix жұлдыздарының шынайы өмірі
Бұл жұп – әлемдік руфинг (ғимараттардың төбесіне заңсыз шығу) мәдениетіндегі ең танымал есімдер. Олар бұған дейін Дубай, Гонконг және Париждегі ең биік мұнараларды бағындырған. 2024 жылы Netflix платформасында осы жұптың қауіп пен махаббат астасқан өмірі туралы «Skywalkers: A Love Story» атты деректі фильмі жарық көріп, әлемдік деңгейде хитке айналған еді. Нью-Йорктегі бұл трюк олардың кинодағы өмірінің шынайы өмірдегі заңды жалғасы іспетті болды.
Романтиканың соңы темір тор және заң алдындағы жауапкершілік
Биіктен түскен бойда Ангела мен Иванды Нью-Йорк полициясы (NYPD) бірден тұтқындады. Енді оларға АҚШ заңнамасы бойынша өте ауыр айыптар тағылып отыр. Атап айтқанда:
- Ұрлық мақсатында ғимаратқа басып кіру (Burglary).
- Айналадағы адамдардың өмірі мен денсаулығына немқұрайлылықпен қауіп төндіру.
- Бөтеннің мүлкіне қасақана зақым келтіру.
- Күзетілетін аумаққа заңсыз кіру және қоғамдық тәртіпті бұзу.
Батыл қадам мен заң бұзушылықтың арасы өте нәзік. Олардың бұл әрекеті әлеуметтік желіде үлкен қолдауға ие болғанымен, АҚШ соты руферлердің романтикалық сезімдеріне емес, заңның орындалуына басымдық беретіні анық.
Руфинг деген не?
Психологтардың айтуынша, экстремалды жағдайда бірге болған жұптардың арасындағы сезім өте берік болады, өйткені қауіп үстінде бөлінетін адреналин мен окситоцин гормондары адамдарды бір-біріне қатты жақындатады. Алайда, руфинг – өмірге өте қауіпті және әлемнің көптеген елдерінде қылмыс болып саналатын әрекет.
Руфер (ағылшын тіліндегі «roof» – шатыр деген сөзден шыққан) – заманауи урбанистік мәдениеттің бір бағыты, яғни биік ғимараттардың, аспан тірегендердің, көпірлердің, мұнаралар мен өндірістік нысандардың төбесіне заңсыз немесе заңды түрде шығатын экстремал адам.
Бұл қозғалыстың өз ерекшеліктері, философиясы мен қауіптері бар:
- Руферлер тек биіктікке шығып қана қоймайды. Олардың басты мақсаты – адреналин сезіну. Көптеген руферлер ешқандай сақтандыру арқандарынсыз (альпинистік құралдарсыз), тек өз күшіне сеніп шығады.
- Ерекше кадрлар түсіреді. Биіктен қаланың әдемі көрінісін (панорамасын) суретке немесе видеоға түсіріп, әлеуметтік желілерде бөліседі.
- Жабық кеңістікті бағындыру. Атап айтқанда Күзетілетін, қарапайым адамдар кіре алмайтын нысандарға (мысалы, құрылысы бітпеген ғимараттарға) құпия түрде өту олар үшін үлкен азарт.
Руферлікті де іштей бірнеше топқа бөлуге болады:
- Романтиктер: Олар тек қаланың сұлулығын тамашалау, күннің батқанын немесе шыққанын жоғарыдан көру үшін ғана шығады. Әдетте заң бұзбауға тырысады.
- Арт-руферлер (немесе фотографтар): Басты мақсаты – ешкімде жоқ, таңғажайып эксклюзивті суреттер жасау.
- Экстремалдар (немесе Инфильтраторлар): Ең қауіпті түрі. Олар әдейі ең биік, ең қатаң күзетілетін әскери немесе мемлекеттік нысандардың төбесіне шығып, нысанның ең шетінде (шпилінде) бір қолмен асылып тұру сияқты өмірге өте қауіпті трюктер жасайды.
Дүниежүзінде руфингтің 90%-ы заңсыз саналады. Себебі руферлер жеке меншік немесе мемлекеттік күзетілетін аймаққа рұқсатсыз кіреді (illegal trespassing). Оларды ұстаған жағдайда үлкен көлемде айыппұл салынады, әкімшілік қамауға алынады, ал шетелде бұл қылмыстық жауапкершілікке (түрмеге жабылуға) әкеп соғуы мүмкін.
Маңызды ескерту: Руфинг – өмірге тікелей қауіп төндіретін экстрим. Әлемде жыл сайын жүздеген жасөспірімдер мен кәсіби руферлер бір ғана абайсыз қимылдың кесірінен биіктіктен құлап, көз жұмады.
