Қытайдың Чжэцзян университетінің Қоғамдық денсаулық сақтау мектебі ғалымдары жүргізген зерттеу EastDiet деп аталатын дәстүрлі тамақтану үлгісінің жүрек-қан тамырлары ауруларының қаупін төмендетіп, дене салмағын қалыпты ұстауға көмектесетінін анықтады.
Зерттеу қалай жүргізілді?
Зерттеу барысында Янцзы өзені атырабының 8 931 тұрғынының тамақтану әдеті талданды. Нәтижесінде қатысушылардың шамамен 46 пайызы дәстүрлі EastDiet мәзірін ұстанатыны белгілі болды.
Бұл тамақтану үлгісінің негізін жаңа піскен көкөністер мен жемістер, теңіз өнімдері, тұщы су балығы, тұтас дәнді дақылдар, сүт өнімдері, жаңғақтар, жұмыртқа, соя өнімдері, батат пен таро секілді тамыржемістер және жеуге жарамды саңырауқұлақтар құрайды. Ал ақ күріш, қызыл ет пен қуырылған тағамдар айтарлықтай аз тұтынылады.
Нәтижесі қандай болды?
Зерттеу қорытындысы бойынша, осы диетаны ұстанатын адамдарда:
жүрек-қан тамырлары ауруларының қаупі 22% төмен;
іш аумағына май жиналу қаупі 17% аз.
Ер адамдар арасында бұл көрсеткіш одан да жоғары болды: оларда жүрек-қан тамырлары ауруларының даму қаупі 36% дейін төмендеген.
Сонымен қатар ғалымдар EastDiet ішек микрофлорасының құрамына және зат алмасу процесіне оң әсер ететінін анықтады. Бұл өз кезегінде семіздік пен жүрек ауруларының алдын алуға ықпал етуі мүмкін.
Бұл диетаның ерекшелігі неде?
Зерттеу авторларының айтуынша, EastDiet диетологтар әзірлеген арнайы мәзір емес. Ол ғасырлар бойы жергілікті ауыл шаруашылығының ерекшеліктері, маусымдық табиғи өнімдердің молдығы және өзен-көлдердің көп болуының арқасында табиғи түрде қалыптасқан.
Мамандардың пікірінше, бұл тамақтану жүйесі көптеген қағидалары бойынша Жерорта теңізі диетасына ұқсайды. Екі диетада да табиғи өнімдерге, көкөністерге, балық пен теңіз өнімдеріне басымдық беріліп, өңделген тағамдарды шектеуге мән беріледі.
Дегенмен қытайлық EastDiet мәзірінде соя өнімдері, тұщы су балығы, тамыржемістер мен жеуге жарамды саңырауқұлақтар көбірек пайдаланылады.
Ғалымдардың айтуынша, EastDiet – ғылыми тұрғыдан негізделген дұрыс тамақтану үлгілерінің бірі. Оның негізгі қағидалары – маусымдық көкөністерді, балықты, бұршақ тұқымдастарды және табиғи өнімдерді көбірек тұтыну, ал қуырылған әрі қатты өңделген тағамдарды азайту – Қытайдан тыс жерлерде тұратын адамдар үшін де пайдалы болуы мүмкін.
