Қазақстан Орталық сайлау комиссиясы 23 тамызда өтетін Құрылтай депутаттарын сайлауға дайындық аясында кезекті отырысын өткізді. Жиынға мемлекеттік органдардың, саяси партиялардың, халықаралық байқаушылардың, бұқаралық ақпарат құралдарының өкілдері және өңірлік сайлау комиссиялары бейнебайланыс арқылы қатысты.
Отырыста партиялық тізімдерді тіркеу науқанының аяқталғаны хабарланды. Орталық сайлау комиссиясының мәліметінше, сайлауға қатысу үшін құжаттарын жеті саяси партия тапсырған. Жалпы Құрылтай депутаттығына 545 кандидат тіркелді.
Комиссия барлық партияның заңнамада көзделген әйелдер, жастар және мүгедектігі бар азаматтар өкілдігіне қатысты талаптарды орындағанын мәлімдеді. Кандидаттардың орташа жасы - 45 жас.
Сонымен қатар, халықаралық байқаушыларды аккредиттеу жұмыстары жалғасуда. Қазіргі таңда 86 шетелдік мемлекет пен халықаралық ұйым өкілі тіркелген. Бұл рәсім тамыз айының ортасына дейін жалғасады.
Жиында өңір әкімдіктерінің сайлауалды үгіт-насихат жұмыстарына дайындығы да қаралды. Ел бойынша үгіт материалдарын орналастыруға және сайлаушылармен кездесулер өткізуге арналған орындар белгіленген. Орталық сайлау комиссиясының төрағасы, әсіресе ірі қалаларда мұндай алаңдардың қосымша қорын қарастыруды тапсырды.
Ресми түрде сайлауалды үгіт-насихат кезеңі 23 шілде күні кешке басталды. Комиссия сайлау науқанына қатысушылардың сайлау заңнамасының талаптарын қатаң сақтауы қажет екенін ескертті. Заң талаптары бұзылған жағдайда кандидаттың тіркеуі күшін жоюға дейінгі шаралар қолданылуы мүмкін.
Отырыс барысында партиялардың сайлау бюллетеніндегі орналасу ретін анықтайтын жеребе тарту рәсімі де өтті. Нәтижесінде бірінші нөмірмен «Әділет» партиясы орналасты. Одан кейін Жалпыұлттық социал-демократиялық партия, Қазақстанның «Байтақ» жасылдар партиясы, Қазақстан халық партиясы, «Ауыл» партиясы, «Ақ жол» Қазақстан демократиялық партиясы және Respublica партиясы тұр.
Сондай-ақ комиссия биылғы сайлау науқанында енгізілген бірқатар жаңа талаптарды түсіндірді. Енді дауыс беру күні толтырылған сайлау бюллетенін фотоға немесе бейнежазбаға түсіруге тыйым салынады. Бұған қоса, алдыңғы сайлау науқандарынан қалған үгіт материалдарын пайдалануға жол берілмейді.
Орталық сайлау комиссиясы қоғамдық пікірге жүргізілген сауалнамалардың нәтижелерін дауыс беруге бес күн қалғанда және сайлау күні жариялауға тыйым салынатынын еске салды. Бұл талап бұқаралық ақпарат құралдарына да, онлайн-платформаларға да қолданылады.
