Жаңалықтар

Қостанайда су тасқынынан зардап шеккен ауылдарға уақытша паналау үшін киіз үй берілді

Қостанайда су тасқынынан зардап шеккен ауылдарға уақытша паналау үшін киіз үй берілді
Фото: © El.kz 23.05.2024 02:24 326

Қостанай облысында су тасқынынан зардап шеккендерге көмек ретінде киіз үй берілді, деп хабарлайды El.kz ақпарат агенттігі.

"Салиқалы ұрпақ" қоры су тасқынынан зардап шеккен ауылдарға киіз үйлер жіберді. Халықтың сұранысына орай сатып алынған жылу Арқалық қаласына қарасты "Екідің" және "Қызыл жұлдыз" елді мекендеріне жөнелтілді. 

Қостанай өңіріндегі бұл ауылдарды су басып, үйлер қирап, шарасыз қалған халық түгел көшірілген еді. Сондықтан қор  мүшелері жергілікті тұрғындардың жан-айқайын тыңдап, қандай мұқтаждық басым екендігін біліп, жағдайды көзбен көру үшін осы ауылдарға арнайы барған еді. Уақытша паналайтын киіз үй сұраған халықтың тілеуі көп ұзамай орындалды. 

Су тасқынының салдарынан тірнектеп жинаған барлық дүние-мүлкінен, малынан айырылған халықтың жағдайы әлі күнге дейін күрделі екендігіне көзіміз жетті. Тұрғындардың көпшілігі паналайтын орын таппай қиналып отыр екен. Сондықтан, көптің тілеуі - киіз үй болды. Біз, яғни "Салиқалы ұрпақ" қоры жиналған халыққа уәде етіп, бірден тапсырыс бердік. Тапсырысымыз уақытында дайын болып, мінекей, бүгін киіз үйлерді ауыл ішіне құрып, халыққа табыстадық, сөзімізде тұрдық. Бастысы, киіз үйлердің сапасына мән бердік. Барлығы талапқа сай жасалды. Жергілікті халық ризашылығын, шексіз алғыстарын білдіріп жатыр. "Жұмыла көтерген жүк жеңіл", - дейді ғой. Сондықтан, қандай қиыншылық болса да, халықпен бірге болайық, - деді қор директоры Қасым Қасабеков.

Еске салайық, су тасқыны кезінде Арқалық қаласына қарасты "Екідің" және "Қызыл жұлдыз" ауылының тұрғындары тікұшақтың көмегімен қауіпсіз аймаққа, Арқалық қаласындағы эвакуациялық пункттерге көшірілген еді. Жалпы қала аумағындағы су басқан ауылдарда 87 үй, ал тек Екідің ауылының өзінде 38 баспана тұруға жарамсыз деп танылған. Бүгінде жаңа үйлердің құрылысы басталып, халыққа бірте-бірте өтемақы төленіп, шығын өтеліп, кәсіпкерлер тарапынан да тиісті көмек көрсетіліп жатыр.

Бөлісу:
Telegram Қысқа да нұсқа. Жазылыңыз telegram - ға