Жаңалықтар

Қазақстандық театрлар 2024 жылғы маусымды бірқатар жаңа қойылыммен жабады

Қазақстандық театрлар 2024 жылғы маусымды бірқатар жаңа қойылыммен жабады
Фото: ©El.kz/Нурасыл ЕРЖАНОВ 25.06.2024 11:26 313

Қазақстандық театрлар 2024 жылғы театр маусымын бірқатар премьералармен және танымал қойылымдармен қорытындылайды, деп хабарлайды El.kz ақпарат агенттігі.

Абай атындағы Қазақ Ұлттық опера және балет театры өзінің 90-мерейтойлық маусымын Х.Левенсхольдтің «Сильфида» романтикалық балетінің жаңа қойылымымен аяқтады.

Құддыс Қожамияров атындағы республикалық мемлекеттік академиялық ұйғыр музыкалық комедия театры маусымды театрдың 90 жылдығына арналған мерейтойлық Гала-концертпен жапты.

Мұхтар Әуезов атындағы Қазақ ұлттық драма театры 98-ші маусымын жабады. 25 маусымда көрерменге «Қозы Көрпеш-Баян Сұлу» спектаклі көрсетіледі.

28 маусымда Мемлекеттік Республикалық академиялық корей музыкалық комедия театры 92-маусымын «Инь-Янь» қойылымымен аяқтайды.

Республикалық академиялық Неміс драма театры 30 маусымда «Человек подушка» спектаклімен 44-маусымының шымылдығын жабады.

Бикен Римова атындағы Талдықорған драма театры 48-ші маусымын Қ.Тілеуханның «Медаль» спектаклінің премьерасымен аяқтайды. Қойылым 29 және 30 маусымда көрерменге ұсынылады.

«Астана Опера» Мемлекеттік опера және балет театрының 11-маусымы 13 шілдеде қорытындыланбақ. Онда «Еркін мерген» операсының премьерасы сахналанады.

Қалибек Қуанышбаев атындағы Қазақ ұлттық музыкалық-драма театры 33-маусымын 14 шілдеде «Қарагөз» спектаклінің премьерасымен аяқтайды.

31 шілдеде Ғабит Мүсірепов атындағы Қазақ мемлекеттік академиялық балалар мен жасөспірімдер театры 78-маусымын «Ұлпан» спектаклінің премьерасымен жабады.

Айта кетейік, көптеген премьералар мен көрермен көңілінен шыққан қойылымдар елдегі театр өнерінің жоғары деңгейін айшықтап және келесі маусымда жаңа, жан тебірентер қойылымдардың сахналануына сеп болады.

Бөлісу:
Telegram Қысқа да нұсқа. Жазылыңыз telegram - ға