Қазақстандық Мырзахан Жұмахан алғашқы Astana AI Film Festival фестивалінде «Үздік кейіпкер» (Best Character) номинациясының жеңімпазы атанды. Оның It Was Just a Joke («Бұл жай ғана әзіл еді») атты комедиясы жасанды интеллект көмегімен түсірілген фильмдердің халықаралық байқауында жүлдегерлер қатарына енді.
Жеңімпаздар 3 қазанда Астанада жарияланды. Фестивальдің бас жүлдесін Латвиядан келген автор иеленді.
Қазақстандық автордың фильмі не туралы?
Оқиғаның басты кейіпкерлері – ит пен оның иесінің бауыры. Бәрі зиянсыз әзілден басталады, алайда кейін олардың арасындағы жанжал нағыз соғысқа ұласады.
Жұмахан Best Character («Үздік кейіпкер») номинациясында жеңіске жетті. Бұдан бөлек, авторлар үздік оқиға, визуалды тіл, режиссура және тұжырымдама бойынша марапаттарға таласты.
Автордың өзі бәсекенің жоғары болғанына байланысты қатты толқығанын айтты.
«Мұнда талантты әрі мықты адамдар өте көп. Барлық қатысушы үлкен еңбек атқарды, сондықтан олардың әрқайсысы лайықты қарсылас болды», – деді ол.
Бас жүлделерді кімдер алды?
Фестивальдің Гран-приін Латвиядан келген Николай Шестак The First Honest Day фильмі үшін жеңіп алды. Оның картинасында адамның жасаған әрекеттері оның сыртқы келбетін тікелей өзгертеді: жаман іс жасаса – ұсқынсызданып, жақсылық жасаса – көріктене түседі. Автор 450 мың доллар көлеміндегі жүлде қаражатын жаңа шығармашылық жобаларына жұмсамақ.
Екінші орынды Үндістаннан келген Абхик Банерджи SITARA фильмімен иеленді. Ол 200 мың доллар алды.
Үшінші орын испаниялық Эрнест Десумбилаға бұйырды. Оның жұмысы Looking For Perseida деп аталады. Қазылар алқасы оған 100 мың доллар көлемінде жүлде тағайындады.
Фильмдер қалай іріктелді?
Байқауға барлығы 8 067 өтінім түсті. Осы көрсеткіш бойынша фестиваль жасанды интеллект көмегімен жасалған фильмдердің әлемдегі ең ірі халықаралық байқауына айналды.
Байқауға 125 елдің авторлары өз жұмыстарын ұсынды. Финалистерді халықаралық қазылар алқасы бағалады. Оның құрамына ЮНЕСКО-ның бұрынғы басшысы Одри Азуле, Қытай киноиндустриясының өкілдері және инвестор Баладжи Сринивасан кірді.
Финалдық бағдарламаға 25 фильм өтті. Іріктеу кезінде ең алдымен авторлық идея мен фильмнің тұтастығына мән берілді.
Жүлде қоры
Фестивальдің жалпы жүлде қоры 2 миллион долларды құрады. Оның жартысы жеңімпаздарды марапаттауға бағытталды.
Қалған жартысы инвестицияға арналған. Бұл қаражат жасанды интеллект саласында жұмыс істейтін перспективалы командаларға беріледі, сондай-ақ қаржының бір бөлігі Қазақстандағы өндірісті дамытуға жұмсалады.
