Жетісу облысында ұйымдастырылған экспедиция Көксу мен Қарасу өзендерінің тоғысқан жерін дронмен түсіріп алды. Бейнежазбада Көксудың көгілдір суы мен Қарасудың лайлы ағысы түйіскен тұс айқын көрінеді. Екі өзеннің сулары біраз уақыт араласпай қатар ағып, табиғаттың ерекше көрінісін қалыптастырады.
Экспедиция Жоңғар қақпасын зерттеу мақсатында ұйымдастырылған. Түсірілімді саяхатшы Қуаныш Қабиденов жетекшілік ететін туристік клуб жүзеге асырды. Команда Қазақстанның жетуі қиын табиғи орындарына экспедициялар ұйымдастырумен айналысады. Мұндай бағыттарда жолсыз жерлер мен таулы өткелдерге бейімделген арнайы техниканы пайдаланады.
Осы техниканың көмегімен саяхатшылар кәдімгі жол талғамайтын көлік өте алмайтын шатқалдар мен аңғарларға жете алады. Көксу мен Қарасу өзендерінің тоғысқан жері де осындай ерекше бағыттардың бірі болды.
Посмотреть эту публикацию в Instagram
Неліктен судың түсі әртүрлі?
Көксу өзені биік таулардағы мұздықтардан бастау алады. Мұздықтардан еріген сумен бірге тау жыныстарының өте ұсақ бөлшектері ағып келетіндіктен, суға ерекше көгілдір реңк береді.
Ал Қарасу өзені жазық жерлер арқылы ағып, өзімен бірге лай мен шөгінділерді тасымалдайды. Сондықтан оның суы күңгірт әрі лайлы болып келеді.
Екі өзен тоғысқан кезде олардың ағыстары бірден араласпайды. Біраз уақыт бойы көгілдір және лайлы су қатар ағып, табиғаттың ерекше құбылысын көрсетеді. Алайда бірнеше жүз метрден кейін екі ағыс толық араласып, айырмашылық жоғалады.
Туристердің қызығушылығы артып келеді
Жергілікті тұрғындардың айтуынша, шілде-тамыз айларында Көксу өзенінің суы жылынып, көгілдір түсінің қанықтығы азаяды. Сондықтан бұл ерекше көріністі тамашалау немесе суретке түсіру үшін жаздың басында барған тиімді. Көксу мен Қарасу өзендерінің тоғысқан жері Рудничный ауылының маңында орналасқан.
Соңғы жылдары Жетісу өңірі ішкі туризмнің танымал бағыттарының біріне айналып келеді. Жоңғар Алатауының етегіндегі шатқалдар, мұздық өзендер мен табиғи ландшафттар көркемдігі жағынан Қазақстандағы ең әсем орындардың бірі саналғанымен, көпшілікке әлі де кеңінен таныла қойған жоқ.
Әзірге Көксу мен Қарасу өзендерінің тоғысқан жері арнайы туристік нысан ретінде жабдықталмаған. Мұнда бағыттаушы белгілер, жаяу жүргінші соқпақтары немесе бақылау алаңдары жоқ. Сондықтан бұл жерге арнайы дайындалған техникамен немесе тәжірибелі туристік клубтардың көмегімен ғана жетуге болады.
