Қазақстанда көлік таңдағанда оның бағасы мен сыртқы келбетіне ғана емес, жанармай шығынына да мән беретіндер көп. Әсіресе күн сайын қала ішінде жүретін жүргізуші үшін отын шығынындағы бір-екі литрдің өзі маңызды.
Ресми өндірушілер мен Қазақстандағы дистрибьюторлардың техникалық сипаттамаларын салыстырғанда, жанармайды салыстырмалы түрде аз тұтынатын бірнеше модельді атауға болады. Бұл тізімдегі көрсеткіштер өндірушілер жариялаған аралас циклдегі шығынға негізделген. Нақты шығын жүргізу мәнеріне, кептеліске, ауа райына, жол жағдайына және көліктің жүктемесіне байланысты өзгереді.
Chevrolet Onix – 4,7 л/100 км
Қазақстанда ресми сатылатын Chevrolet Onix үнемді көліктердің бірі болып тұр. Өндірушінің техникалық сипаттамасында оның 1,2 литрлік қозғалтқышы мен алдыңғы жетегі көрсетілген.
Onix-тің 3LT, LTZ және басқа да қуатты нұсқаларында аралас циклдегі жанармай шығыны 4,7 л/100 км деп көрсетілген. Ал 90 ат күші бар механикалық беріліс қорабындағы нұсқада бұл көрсеткіш 4,8 л/100 км. Қалалық циклдегі шығын тиісінше 6,2 және 5,9 л/100 км.
Яғни теориялық көрсеткіш бойынша 100 шақырымға 4,7 литр жұмсайтын нұсқа 50 литрлік бакпен өте ұзақ жол жүре алады. Бірақ бұл нақты өмірдегі шығын емес, өндіруші көрсеткен сынақ нәтижесі екенін ескеру керек.
Kia Ceed – 5,8 л/100 км
Kia Ceed-тің Қазақстандағы ресми техникалық материалдарында кейбір нұсқалары үшін аралас циклдегі шығын 5,8 л/100 км деп көрсетілген. Бұл көрсеткіш 1,5 литрлік қозғалтқышы мен 7 сатылы роботтандырылған беріліс қорабы бар нұсқаға қатысты.
Сол техникалық сипаттамада оның қалалық циклдегі шығыны 7,6 л/100 км, ал тасжолдағы көрсеткіші 4,8 л/100 км деп берілген.
Ceed-тің үнемділігіне қозғалтқыш көлемінен бөлек, аэродинамикасы, көлік салмағы және трансмиссиясы да әсер етеді. Сондықтан тек мотор көлеміне қарап көліктің қанша жанармай жұмсайтынын болжау дұрыс емес.
Chery Arrizo 8 – 6,2 л/100 км
Үнемді көлік міндетті түрде шағын хэтчбек болуы керек деген түсінік қате. Мысалы, Қазақстандағы Chery-дің ресми материалдарында Arrizo 8 седанының 1,6 литрлік турбоқозғалтқышы үшін аралас циклдегі шығын 6,2 л/100 км деп көрсетілген.
Бұл модельдің тасжолдағы ресми көрсеткіші – 5,0 л/100 км, ал қаладағы шығыны – 8,5 л/100 км. Қозғалтқышының қуаты 186 ат күшіне жетеді.
Яғни салыстырмалы түрде үлкен әрі қуатты седан үшін 6,2 л/100 км көрсеткіші назар аударуға тұрарлық. Бірақ қалада жүретін жүргізуші үшін ресми 8,5 литрлік көрсеткіш маңыздырақ болуы мүмкін.
Kia Rio – 6,6 л/100 км
Kia-ның Қазақстан нарығына арналған техникалық материалдарында 1,6 литрлік қозғалтқышы бар модель үшін аралас циклдегі шығын 6,6 л/100 км деңгейінде көрсетілген. Автоматты беріліс қорабы бар нұсқада бұл көрсеткіш 6,8 л/100 км болған.
Өндіруші сипаттамасында қозғалтқыштың көлемі 1591 см³, қуаты 123 ат күші және АИ-92-ден төмен емес бензин қолданылатыны көрсетілген.
Бұл жерде тағы бір маңызды нәрсе бар: бір модельдің өзінде беріліс қорабына, қозғалтқышына және комплектациясына қарай отын шығыны өзгеруі мүмкін.
Kia Seltos – 6,8 л/100 км
Кроссоверлер арасында жанармай шығыны төмен нұсқалардың бірі – Kia Seltos. Қазақстандағы ресми дилердің техникалық сипаттамасында 2,0 литрлік бензин қозғалтқышы, вариатор және толық жетек үшін аралас циклдегі шығын 6,8 л/100 км деп көрсетілген.
Бұл көрсеткіш әсіресе көлік таңдағанда седан емес, клиренсі жоғары кроссовер қажет адамдар үшін қызық. Seltos-тың клиренсі 190 мм, ал жүксалғышының көлемі 498 литр деп көрсетілген.
Нақты шығыны өзгеше болуы мүмкін
Автокөлік өндірушілері жанармай шығынын стандартталған жағдайларда өлшейді. Ал Қазақстандағы күнделікті қозғалыс мүлде басқа болуы мүмкін.
Мысалы, қыста қозғалтқышты ұзақ жылыту, кептеліс, кондиционер немесе жылыту жүйесін пайдалану, шиналардың қысымы, көліктің жүктелуі және жүргізушінің газды басу мәнері шығынды арттырады.
JAC-тың Қазақстандағы ресми пайдалану жөніндегі нұсқаулығында да жүргізу стиліне байланысты жанармай шығынындағы айырмашылық 10-15 пайызға дейін жетуі мүмкін екені көрсетілген.
Сондықтан «4,7 л/100 км» деген көрсеткішті жүргізуші кез келген жағдайда дәл осынша жанармай жұмсайды деп қабылдамауы керек.
Қайсысын таңдаған дұрыс?
Егер негізгі мақсат –жанармайға барынша аз ақша жұмсау болса, ресми аралас цикл көрсеткіштерінің ішінде Chevrolet Onix ерекшеленеді – 4,7 л/100 км.
Ал кроссовер қажет болса, Kia Seltos-тың 6,8 л/100 км көрсеткіші назар аударуға тұрарлық. Үлкенірек седан іздегендер үшін Chery Arrizo 8-дің 6,2 л/100 км көрсеткіші қызық болуы мүмкін.
Бірақ көлік таңдағанда жанармай шығынын жалғыз өлшем етуге болмайды. Көліктің бағасы, техникалық қызмет көрсету құны, қосалқы бөлшектердің қолжетімділігі, қозғалтқыш пен беріліс қорабының ерекшеліктері және нақты пайдалану жағдайы да жалпы шығынға тікелей әсер етеді.
