2026 жылғы футболдан әлем чемпионатының топтық кезеңі мәресіне жетті. 28 маусымға қараған түні бірден алты матч өтіп, плей-оффтың соңғы қатысушылары анықталады. Кейбір құрамалар үшін бұл ойындар тек турнирлік рәсім ғана болса, енді біреулер үшін тағдыр шешер 90 минут болмақ.
Өзбекстанның тарихи мүмкіндігі қаншалықты шынайы?
Орталық Азия атынан алғаш рет әлем чемпионатына қатысып отырған Өзбекстан құрамасы алғашқы екі турда Колумбия мен Португалиядан жеңіліп қалды. Соған қарамастан, команда теориялық тұрғыда плей-оффқа шығу мүмкіндігін әлі де сақтап отыр.
Алайда Фабио Каннаваро шәкірттеріне жай ғана жеңіс жеткіліксіз. Олар Конго Демократиялық Республикасын кемінде алты немесе жеті доп айырмасымен ұтуы тиіс. Оның өзінде басқа топтардағы нәтижелер де өздеріне қолайлы болуы қажет.
Бұл сценарийдің жүзеге асуы өте қиын болғанымен, Өзбекстан үшін әлем чемпионатындағы алғашқы жеңіс те тарихи жетістік саналады. Сондықтан команда турнирмен абыроймен қоштасуға немесе футбол тарихындағы ең ірі сенсациялардың бірін жасауға тырысады.
Колумбия мен Португалия бірінші орын үшін таласады
К тобындағы екінші матчтың маңызы бұдан кем емес. Колумбия мен Португалия плей-офф жолдамасын әлдеқашан қамтамасыз еткенімен, енді топ жеңімпазы атағын сарапқа салады.
Колумбияға тең ойын да жеткілікті. Ал Португалия міндетті түрде жеңіске ұмтылады. Себебі бірінші орын алған команда плей-оффта салыстырмалы түрде жеңіл қарсыласқа тап болуы мүмкін.
Сондықтан Майамидегі кездесу топтық кезеңнің ең тартысты ойындарының біріне айналуы ықтимал.
Англия көшбасшылықты сақтап қала ма?
L тобында Англия Панамамен кездеседі. Томас Тухельдің командасы алғашқы екі турда сенімді ойын көрсетіп, фаворит мәртебесін толық ақтады.
Панамалықтар бұл әлем чемпионатында Хорватия мен Ганадан жеңіліп қалды және сенсация жасау мүмкіндігі аз көрінеді. Англияға топта бірінші орын алу үшін қарапайым жеңіс жеткілікті.
Сонымен бірге Филадельфияда өтетін Хорватия – Гана кездесуі екінші жолдаманың иесін анықтауы мүмкін. Хорваттарға жеңілмеу аса маңызды, ал Гана тек жеңіске сенеді.
Месси ойнай ма?
J тобындағы Аргентина барлық мәселені ерте шешіп қойған командалардың бірі. Лионель Скалони шәкірттері топ жеңімпазы атанып үлгерді.
Енді басты сұрақ – Лионель Месси алаңға шыға ма?
39 жасқа толған аргентиналық шабуылшы әлем чемпионатындағы голдарын көбейтуді көздеуі мүмкін. Бірақ бапкер плей-офф алдындағы тәуекелге бармай, көшбасшысын демалдыруы да ғажап емес.
Иордания болса турнирмен қоштасуға дайындалып отыр.
Алжир мен Аустрия келісімге келе ме?
Түннің ең қызық тактикалық кездесулерінің бірі Алжир мен Аустрия арасында өтеді.
Турнирлік кестеге қарағанда тең нәтиже екі команданы да қанағаттандыруы ықтимал. Мұндай жағдайда Аустрия екінші орынмен, Алжир үздік үшінші орын иелерінің бірі ретінде плей-оффқа өте алады.
Бірақ мұнда басқа мәселе бар. Егер аустриялықтар екінші орын алса, келесі кезеңде Испаниямен кездесуі мүмкін. Сондықтан олар үшін бірінші орын әлдеқайда тиімді.
Бұл матчтың айналасында тағы бір тарихи астар бар. 1982 жылғы әлем чемпионатында Аустрия мен Батыс Германия арасындағы күмәнді матчтың салдарынан дәл Алжир жарыстан шығып қалған еді. Биылғы кездесу сол оқиғаны еске түсіріп отыр.
Плей-офф алдындағы соңғы сынақ
2026 жылғы әлем чемпионаты алғаш рет 48 құраманың қатысуымен өтіп жатыр. Осыған байланысты плей-оффқа әр топтан алғашқы екі командамен бірге үздік сегіз үшінші орын иелері де жолдама алады.
Соңғы турдағы матчтардың ерекшелігі – кейбір командалар жеңіске емес, өздеріне тиімді қарсыласты таңдауға да назар аударуы мүмкін. Сондықтан жанкүйерлерді тек голдар ғана емес, тактикалық есептер мен күтпеген нәтижелерге толы қызықты түн күтіп тұр.
Ал Орталық Азия жанкүйерлерінің басты назары, сөзсіз, Өзбекстан құрамасына ауады. Плей-оффқа шығу мүмкіндігі өте аз болғанымен, әлем чемпионатындағы тарихи алғашқы жеңіс өңір футболы үшін маңызды нәтиже болмақ.
