Абай облысында «38» көркем фильмінің түсірілімі аяқталды, деп хабарлайды El.kz интернет порталы.
Мәдениет және ақпарат министрлігінің мәліметінше, картина өткен жылғы питчингтің жеңімпазы атанды.
«38» – қазақ кинематографиясы тарихындағы орманшыларға арналған тұңғыш фильм. Лента табиғатқа жауапкершілікпен қарау, қоршаған ортаны қорғау, орманшылардың еңбегі секілді мәселелерді ашып көрсетеді, - делінген мәліметте.
Түсірілім процесі Абай облысының көрікті аймақтарында өтті. Қоюшы режиссер Төребек Бейсебаевтың айтуынша, өрт сөндіру техникасымен жұмыс істеу түсірілімнің техникалық тұрғыдан ең күрделі кезеңі болды.
Сценарий авторлары – Нұржігіт Хайдаров пен Мақсат Жұмаханов, қоюшы оператор – Асылхан Медәлбеков, қоюшы суретші - Олжас Әлменов, продюсер – Нұржігіт Хайдаров.
Түсірілімге Алмат Сақатов, Асан Мәжит , Алтынай Нөгербек сияқты танымал актерлер қатысты.
