Қазақстанда алдағы жылдары денсаулық сақтау инфрақұрылымын жаңғырту бағытында ауқымды құрылыс жұмыстары жүргізілмек. Республика бойынша 70-ке жуық жаңа медициналық нысан салу жоспарланып отыр.
Олардың қатарында заманауи перинаталдық орталықтар, көпбейінді балалар ауруханалары, оңалту орталықтары мен емханалар бар. Жаңа жобалардың бірқатары Маңғыстау облысында да жүзеге асырылмақ. Бұл туралы Үкімет пен Денсаулық сақтау министрлігінің ресми мәліметтерінде айтылған.
Сегіз перинаталдық орталық салу жоспарланған
Мемлекет басшысының тапсырмасына сәйкес, Денсаулық сақтау министрлігі өңірлердегі медициналық-демографиялық жағдайды ескере отырып, жаңа нысандарға деген қажеттілікті зерделеген. 2026 жылғы 29 қазанда Үкімет отырысында министр Ақмарал Әлназарова ел аумағында 70-ке жуық медициналық нысан салу жоспарын таныстырды.
Жоспарға сәйкес, ана мен бала денсаулығын қорғау және босандыру қызметінің сапасын арттыру мақсатында жалпы сыйымдылығы 1700 төсекке арналған сегіз заманауи перинаталдық орталық бой көтереді. Олар Астана, Алматы, Шымкент, Қарағанды, Қаскелең, Қызылорда және Орал қалаларында салынады. Астанада екі орталықтың құрылысы қарастырылған.
Бұл жобалар перинаталдық көмектің қолжетімділігін арттырып, ана мен бала денсаулығына қатысты медициналық қызмет сапасын жақсартуға бағытталған. Әсіресе халық саны өсіп келе жатқан қалаларда заманауи босандыру мекемелеріне деген қажеттілік артып отыр.
Жеті қалада балалар ауруханасы салынады
Балаларға көрсетілетін медициналық көмекті кеңейту де жоспардың негізгі бағыттарының бірі. Үкімет отырысында жарияланған бастапқы жоспар бойынша Атырау, Ақтөбе, Алматы, Шымкент, Қаскелең, Семей және Ақтау қалаларында жалпы сыйымдылығы 1550 төсек болатын жеті көпбейінді балалар ауруханасын салу көзделген.
Бұл медициналық мекемелер балаларға мамандандырылған және жоғары технологиялық көмек көрсетуге мүмкіндік береді. Жаңа ауруханалар пайдалануға берілген жағдайда, өңірлердегі ата-аналар күрделі ем-дом алу үшін балаларын басқа қалаларға апаруға мәжбүр болмайды.
Сонымен қатар Астанада 200 төсекке арналған балаларға шұғыл көмек көрсету орталығы мен 350 төсекке арналған балалар хирургиясы орталығын салу жоспарланған.
Айта кетейік, 2026 жылғы 12 қарашада Денсаулық сақтау министрлігі бес жаңа көпбейінді балалар ауруханасының құрылысына қатысты қосымша ақпарат жариялады. Ведомствоның мәліметінше, жалпы сыйымдылығы 1000 төсек болатын бұл нысандар Атырау, Ақтөбе, Алматы, Шымкент және Қаскелең қалаларында салынады. Әр аурухана 200 төсекке есептелген. Ал Алматыда 500 төсектік республикалық ғылыми балалар госпиталін салу мәселесі де қарастырылып жатыр.
Министрлік жобалық құжаттаманы әзірлеу және қаржыландыру тетіктерін пысықтау жұмыстарын жүргізіп жатқанын хабарлады.
Ақтауда балаларды оңалту орталығының филиалы ашылады
Жаңа медициналық инфрақұрылымның маңызды бөлігі балаларды оңалту қызметін дамытуға бағытталған. Осы мақсатта Алматы, Ақтау, Атырау, Қызылорда және Семей қалаларында Ұлттық балаларды оңалту орталығының бес өңіраралық филиалын ашу жоспарланған. Олардың жалпы сыйымдылығы 750 төсек болады.
Бұл жоба Маңғыстау облысы үшін де маңызды. Ақтауда филиалдың ашылуы өңірдегі балалардың оңалту қызметтеріне қолжетімділігін кеңейтуге мүмкіндік береді. Әсіресе ұзақ мерзімді оңалту мен арнайы медициналық көмекті қажет ететін балалар үшін мұндай орталықтың маңызы зор.
Осылайша, Ақтауда көпбейінді балалар ауруханасы мен Ұлттық балаларды оңалту орталығының өңіраралық филиалын ашу жоспарланып отыр. Бұл екі жоба өңірдегі балалар медицинасының мүмкіндіктерін кеңейтуге бағытталған.
Өңірлерде тағы қандай нысандар бой көтереді?
Медициналық инфрақұрылымды дамыту жоспары перинаталдық және балалар ауруханаларымен шектелмейді. Шығыс Қазақстан облысының Өскемен қаласында, Абай және Түркістан облыстарында әрқайсысы 300 төсекке арналған көпбейінді ауруханалар салу көзделген.
Ал Жамбыл облысында 325 төсекке арналған инфекциялық аурухана мен мамандандырылған медициналық корпустар бой көтереді.
Бұдан бөлек, республика бойынша 25 амбулаториялық-емханалық нысан, аудандық ауруханалар, жедел медициналық жәрдем нысандары, қан орталықтары және басқа да мамандандырылған мекемелер салынбақ.
Денсаулық сақтау министрінің мәліметінше, жоспарланған жобаларды жүзеге асыру нәтижесінде шамамен 1,8 миллион шаршы метр медициналық инфрақұрылым құрылып, жаңартылады. Стационарлардағы төсек-орын қоры 9,2 мыңға ұлғайып, жаңғыртылады. Ал амбулаториялық көмектің қуаты бір ауысымда 5,3 мыңнан астам қабылдауға артады.
Құрылыстың мақсаты – медициналық көмектің қолжетімділігін арттыру
Жоспарланған жобалар халық санының өсуіне және өңірлердегі медициналық қызметке деген сұранысқа байланысты қолға алынбақ. Әсіресе ана мен бала денсаулығын қорғау, балаларға мамандандырылған көмек көрсету және оңалту қызметтерін дамыту басым бағыттардың қатарында.
Мемлекеттік жоспар бойынша жаңа медициналық нысандарды салуға республикалық бюджетпен қатар, Инфрақұрылымды дамыту қорының қаражаты және мемлекетке қайтарылған активтер есебінен қаржы бағыттау көзделген. Сонымен бірге ірі әлеуметтік жобаларға жеке капитал тарту мәселесі де қарастырылуда.
Жалпы, 70-ке жуық медициналық нысанның құрылысы еліміздің денсаулық сақтау жүйесін жаңғыртуға бағытталған маңызды бастамалардың бірі болмақ. Ал Маңғыстау үшін Ақтауда балалар ауруханасы мен оңалту орталығы филиалының ашылуы өңір тұрғындары көптен күткен медициналық қызметтердің қолжетімділігін арттыруға мүмкіндік беретін жобалар саналады.
