Немістің Audi компаниясы өзінің ең танымал әрі қымбат седандарының бірі – A8 моделінің өндірісін тоқтатты. 1994 жылдан бері шығарылып келген көлік төрт буын бойы Mercedes-Benz S-Class пен BMW 7 Series модельдеріне бәсекелес болды. El.kz тілшісі әйгілі автокөліктің тарихына шолу жасап, көпшілік біле бермейтін ерекшеліктерін жинақтады.
Германияның Auto Motor und Sport басылымының хабарлауынша, 2026 жылдың қазан айының ортасында Неккарзульм қаласындағы Audi зауытынан соңғы A8 көлігі шығарылған. Осылайша, 32 жылға созылған өндіріс тарихы аяқталды. Бұған дейін аталған зауытта A8 құрастырылған цех енді Audi A5 седандары мен A5 Avant универсалдарын шығаруға бейімделген.
Әзірге Audi A8 моделінің тікелей ізбасары таныстырылған жоқ. Компания өкілдері жаңа модельге қатысты ақпаратты кейінірек жариялайтынын мәлімдеген. Сондықтан A8 атауы автомобиль нарығынан біржола жоғалады деп айтуға әлі ерте.
Бірінші буын: алюминийден жасалған ерекше көлік (1994-2002)
Audi A8 алғаш рет 1994 жылы Женева автосалонында таныстырылды. Ол бұған дейін шығарылған Audi V8 моделінің орнын басты. Жаңа көліктің басты ерекшелігі – шанағының алюминийден жасалуы. Компания сол кезең үшін озық саналатын Audi Space Frame (ASF) технологиясын қолданды. Бұл шешім көліктің салмағын азайтып, құрылымының беріктігін сақтауға мүмкіндік берді.
Алғашқы A8 сатып алушыларға 2,8 және 3,7 литрлік бензин қозғалтқыштарымен ұсынылды. Кейін қозғалтқыш түрлері көбейді.
1996 жылы спорттық Audi S8 нұсқасы пайда болды. Ол 4,2 литрлік V8 қозғалтқышымен жабдықталды. Қуаты 360 ат күшіне жететін бұл модель жоғары жылдамдықты ұнататын жүргізушілерге арналды.
1998 жылдың соңында Audi A8 жаңартылды. Көліктің алдыңғы шамдары, радиатор торы мен бамперлері өзгерді. Салонына да жаңаша әрлеу материалдары қолданылды.
Инженерлер дыбыс оқшаулауын жақсартып, аспа жүйесін жетілдірді. Сондай-ақ қауіпсіздік құралдары толықтырылып, электрондық тұрақтандыру жүйесі енгізілді.
Екінші буын: көлікті басқарудың жаңа мүмкіндіктері (2002-2009)
2002 жылы таныстырылған екінші буын A8 сән-салтанатымен ғана емес, технологиялық жаңалықтарымен де ерекшеленді. Бұл жолы Audi жүргізушінің қолайлылығына басымдық берді. Көлікте MMI (Multi Media Interface) мультимедиалық жүйесі пайда болды. Оның көмегімен жүргізуші автомобильдің негізгі қызметтерін бір басқару тетігі арқылы реттей алды.
Сондай-ақ DVD карталарын пайдаланатын навигация жүйесі орнатылды. Ал пневматикалық аспа жолдағы кедір-бұдырды жұмсартып, сапарды жайлы ете түсті. Екінші буынға бензин және дизель қозғалтқыштары орнатылды. Ең қуатты нұсқаларының бірі 6 литрлік W12 қозғалтқышымен жабдықталды.
2005 жылы модельдің сыртқы келбеті өзгерді. Әсіресе алдыңғы бөлігіндегі үлкен радиатор торы бірден көзге түсетін болды. Осы кезеңде ұзартылған A8 L нұсқасы да ұсынылды. Бұл көлік жүргізуші жалдап, артқы орындықта отыруды қалайтын сатып алушылар үшін қолайлы еді.
Үшінші буын: жүргізушіге көмектесетін ақылды жүйелер (2010-2017)
2010 жылы жарық көрген үшінші буын A8 электрондық жүйелерімен ерекшеленді. Көліктің алдыңғы панеліне ішке жиналатын мультимедиалық экран орнатылды. Сондай-ақ сенсорлық басқару тетіктері мен жоғары сапалы дыбыс жүйесі ұсынылды.
Маңызды жаңалықтардың бірі – Audi Pre Sense қауіпсіздік жүйесі. Ол ықтимал соқтығыс қаупін анықтап, оның салдарын азайтуға көмектесетін әрекеттерді орындай алды.
Ал 2013 жылғы жаңартудан кейін A8 Matrix LED технологиясымен жабдықталды. Бұл шамдардың ерекшелігі – жол жағдайына қарай жарық бағытын өзгерте алуы. Мәселен, қарсы келе жатқан жүргізушінің көзіне жарық түсірмей, жолдың басқа бөліктерін жарықтандыруға мүмкіндік берді.
Навигация жүйесі де жарықтандырумен байланыстырылды. Соның арқасында автомобиль алдағы бұрылысты ескеріп, жолды алдын ала жарықтандыра алатын болды.
Төртінші буын: болашақтың көлігі қандай болатынын көрсетті (2017-2026)
Audi A8-дің төртінші буыны 2017 жылы таныстырылды. Бұл модельде компания цифрлық технологияларға ерекше көңіл бөлді. Салонға Virtual Cockpit цифрлық аспаптар панелі және бірнеше сенсорлық экран орнатылды. Жүргізуші көліктің көптеген қызметін осы экрандар арқылы басқара алатын болды.
Жаңалықтардың бірі – жолдағы кедір-бұдырды алдын ала анықтайтын белсенді аспа жүйесі. Ол автомобильдің қозғалысын жол жағдайына бейімдеуге мүмкіндік берді.
Тағы бір ерекше технология көлік бүйірінен соққы алу қаупі туындағанда іске қосылатын. Жүйе автомобиль шанағының бір жағын көтеріп, соққының жолаушыларға әсерін азайтуға бағытталды.
Audi осы буынға үшінші деңгейлі автоматтандырылған жүргізу жүйесін енгізуді де жоспарлады. Алайда оны пайдалануға қатысты заңнамалық және өзге де шектеулер салдарынан функция кең көлемде қолданысқа енген жоқ.
2021 жылы төртінші буын жаңартылды. Көлік жаңа шамдармен, радиатор торымен және жетілдірілген интерьермен ұсынылды. Артқы орындықта отыратын жолаушыларға ерекше жағдай жасалды. Кейбір нұсқаларда 18 пневматикалық жастықшасы бар, массаж жасайтын орындықтар орнатылды.
Audi A8 туралы көпшілік біле бермейтін қызықты деректер
- Алюминий шанақты әзірлеуге 12 жыл кеткен
Audi инженерлері жеңіл әрі берік автомобиль жасау идеясын A8 шыққанға дейін зерттеген. 1993 жылы Франкфурт автосалонында Audi ASF концептісі таныстырылды. Ол алюминий құрылымының мүмкіндіктерін көрсетіп, болашақ A8 моделінің негізіне айналды.
- Саясаткерлер мінген автомобиль
Audi A8 әр жылдары жоғары лауазымды мемлекеттік қызметкерлер пайдаланған көліктердің бірі болды. Мәселен, Германияның бұрынғы канцлері Ангела Меркель қызмет бабында осы модельді пайдаланған. Бұдан бөлек, Италияның бұрынғы премьер-министрі Сильвио Берлускони де A8 мінген саясаткерлер қатарында аталады.
Беларусь президенті Александр Лукашенконың да осы модельді пайдаланғаны туралы мәліметтер бар.
- Аяққа массаж жасайтын орындық
Audi A8-дің ең қызықты мүмкіндіктерінің бірі – артқы жолаушыларға арналған Relaxation Seat орындығы. Әсіресе Қытай нарығына арналған Audi A8 L Horch нұсқасында жайлылыққа ерекше көңіл бөлінген.
Орындықтағы арнайы тіреуіш жолаушының аяғын созып отыруына мүмкіндік береді. Бұған қоса, аяққа жылу беріп, табанға массаж жасайтын функция қарастырылған.
- Түнгі жолда жүргізушіге көмектесетін шамдар
Audi A8-де қолданылған Matrix LED жүйесі автомобиль жарығының мүмкіндіктерін кеңейтті. Жүйе қарсы бағыттағы көліктерді ескеріп, жарық ағынын өзгерте алады. Осылайша, жолдың қажетті бөліктері жарықтандырылып, өзге жүргізушілердің көзін қарықтыру қаупі азаяды.
- Жол апатына дайындала алатын аспа
Төртінші буындағы белсенді аспа тек жайлы қозғалыс үшін жасалған жоқ. Белгілі бір жағдайларда автомобиль бүйірден соқтығысу қаупін анықтаса, шанақтың тиісті жағын көтере алады. Мұндағы мақсат – соққы күшін көліктің берік құрылымдарына бағыттап, жолаушылардың жарақат алу қаупін төмендету.
Audi A8 қайта шығарыла ма?
Қазіргі уақытта Audi A8-дің жаңа буыны қашан таныстырылатыны ресми түрде жарияланған жоқ. Motor1 басылымы компанияның болашақта модельді қайта шығаруы мүмкін екенін, алайда әзірге оның нақты жоспары белгісіз екенін жазды.
Осылайша, 1994 жылы басталған Audi A8 тарихының қазіргі кезеңі аяқталды. Төрт буын бойы шығарылған седан алюминий шанағы, жетілдірілген қауіпсіздік жүйелері, жарықтандыру технологиялары және жолаушыларға арналған жайлылық мүмкіндіктері арқылы автомобиль өнеркәсібінде өзіндік із қалдырды.
Ал A8 атауы болашақта қайта орала ма, жоқ па – бұл сұрақ әзірге ашық.
