Жаңа оқу жылының басталуына санаулы апта қалғанда ата-аналар балаларын мектепке дайындауға кіріседі. Киім-кешек, аяқ киім, сөмке, кеңсе тауарлары мен басқа да қажетті заттарды сатып алу отбасы бюджетіне салмақ түсіруі мүмкін. Әлеуметтік осал санаттағы отбасыларға бұл шығынның бір бөлігін мемлекет өтейді. Биыл көмек көлемі де артты.
Оқушыны мектепке дайындау кезінде ата-аналардың негізгі шығыны киім мен аяқ киімге жұмсалады. Бұл барлық жоспарланған шығынның шамамен 34 пайызын құрайды.
Кеңсе тауарлары мен кітаптарға 28 пайыз, ал мектеп сөмкесі мен түрлі керек-жарақтарға 17 пайыз қаражат жұмсалады. Қалған шығын оқу жылына қажетті басқа да заттарды сатып алуға бағытталады.
Мемлекеттік көмек кімдерге беріледі?
«Жалпыға бірдей білім беру» бағдарламасы аясында мемлекеттік көмек алуға өтініштер 2026 жылғы 1 тамыздан 30 қыркүйекке дейін қабылданады.
Қолдау әлеуметтік осал санатқа жататын балаларға көрсетіледі. Атап айтқанда, көмек:
-
жетім балаларға және ата-анасының қамқорлығынсыз қалған балаларға;
-
аз қамтылған отбасылардың оқушыларына;
-
атаулы әлеуметтік көмек алатын отбасылардың балаларына;
-
қиын өмірлік жағдайға тап болған балаларға беріледі.
Қаражатты мектеп формасын, аяқ киімді және оқу жылына қажетті басқа да керек-жарақтарды сатып алуға пайдалануға болады.
Биыл қанша ақша беріледі?
2026 жылы бір балаға берілетін көмектің ең төменгі мөлшері 50 851 теңгені құрайды. Бұл өткен жылмен салыстырғанда 10 пайызға жоғары.
Дегенмен төлем көлемі барлық өңірде бірдей болмауы мүмкін. Қолдаудың нақты мөлшерін жергілікті атқарушы органдар бюджет мүмкіндігіне қарай белгілейді. Сондықтан кейбір өңірлерде ата-аналар белгіленген ең төменгі сомадан жоғары төлем алуы ықтимал.
Көмекті қалай рәсімдеуге болады?
Мемлекеттік көмекті алу үшін ата-ана немесе баланың заңды өкілі оқушы білім алатын мектепке барып, өтініш беруі керек.
Өтінішпен бірге заңды өкілдің жеке басын куәландыратын құжаты, баланың туу туралы куәлігі, көмек алуға құқығын растайтын құжаттар және банк шотының деректемелері ұсынылады.
Кей жағдайда отбасының белгілі бір әлеуметтік санатқа жататыны туралы ақпарат мемлекеттік ақпараттық жүйелер арқылы тексеріледі. Сондықтан ата-аналар мектепке жүгінген кезде өз жағдайына қарай қандай құжаттар қажет екенін нақтылай алады.
450 мыңға жуық оқушы көмек алады
2026 жылы «Жалпыға бірдей білім беру» бағдарламасына шамамен 23 млрд теңге қарастырылған.
Оқу-ағарту министрлігінің мәліметінше, биыл еліміз бойынша 450 мыңға жуық оқушыға мемлекеттік көмек көрсету жоспарланған.
Бағдарламаның негізгі мақсаты - әлеуметтік қолдауды қажет ететін отбасылардың балаларын оқу жылына дайындауға жәрдемдесу. Сондықтан тиісті санатқа жататын ата-аналар өтініш қабылдау мерзімі аяқталғанға дейін баласының көмек алуға құқығын мектептен нақтылап, қажетті құжаттарды тапсырғаны жөн.
