Жаңалықтар

Мәжіліс депутаттары Локомотив құрастыру зауытында бас қосты

Мәжіліс депутаттары Локомотив құрастыру зауытында бас қосты
Фото: Мәжілістің баспасөз қызметі 05.12.2023 22:17 515

​​Мәжілістің Әлеуметтік-мәдени даму комитетінің төрағасы Асхат Аймағамбетовтің жетекшілігімен 2030 жылға дейінгі қауіпсіз еңбек тұжырымдамасының жобасын және еңбек қауіпсіздігі мен оны қорғауды жетілдіруге бағытталған заңнамалық өзгерістерді талқылауға арналған дөңгелек үстел ұйымдастырылды. Жиын Астанадағы «Локомотив құрастыру зауыты» базасында өтті, деп хабарлайды El.kz ақпарат агенттігі Мәжілістің баспасөз қызметіне сілтеме жасап. 

Еңбек және халықты әлеуметтік қорғау министрі Светлана Жақыпова еңбекті қорғау саласының қазіргі жағдайы туралы баяндады. Төтенше жағдайлар вице-министрі Мереке Пішембаев қауіпті өндірістік нысандардағы апат деңгейін төмендету шараларына тоқталды. Кәсіподақтар мен салалық бірлестіктердің өкілдері тұжырымдама жобасы бойынша өз пікірлерімен бөлісті.

Талқылау барысында Мәжіліс депутаты Ерлан Саиров еңбек қауіпсіздігін қамтамасыз ету бойынша нақты шаралар қажет екенін атап өтті. Оның ойынша, ең алдымен, жұмысшылардың құқықтарын қорғау кезінде заңнамадан кәсіпорын иелерінің мүдделерін алып тастау қажет.

Депутаттар мен жиынға қатысушылар Қауіпсіз еңбек тұжырымдамасының жобасына қатысты ұсыныстарын айтты.

Бүгін ашық әңгіме болды, біраз жақсы ұсыныс айтылды. Депутаттар еңбек инспекторларын Еңбек министрлігіне қосуды ұсынып отыр, ол Үкімет тарапынан қолдау тапты. Сондай-ақ Кәсіпкерлік кодексі мен басқа да заңдарға мемлекеттік органдарға еңбек қауіпсіздігін бақылау ғана емес, өндірістік, экологиялық, энергетикалық қадағалау және басқа да салаларда тосын тексеру жүргізу мүмкіндігін беретін өзгерістер енгізу қажет. Тұжырымдамада іргелі прогрессивті қадамдар бар, оларды тек пысықтау керек, – деді А.Аймағамбетов.

Бөлісу:
Telegram Қысқа да нұсқа. Жазылыңыз telegram - ға