Көшпенділер ойындарының ашылу салтанатындағы ерекше би қойылымы әлеуметтік желіде қызу талқыланып жатыр. Ауқымды қойылымды америкалық хореограф Кеоне Мадрид қойған. BTS, Джастин Бибер, Билли Айлиш сынды әлемдік жұлдыздармен жұмыс істеген хореографтың биге келу жолы да ерекше. Мадридтің шығармашылығы қалай басталды?
Кеоне Мадрид – америкалық биші, хореограф, режиссер әрі шығармашылық продюсер. Ол жұбайы Мари Мадридпен бірге жұмыс істейді. Олардың шығармашылық тобы би арқылы оқиға айтумен ерекшеленеді. Кейін бұл тәсіл музыкадан бөлек театр, кино, телевидение және анимацияға дейін жетті.
Оның жұмыстарының географиясы да кең. Кеоне АҚШ пен Азиядан бөлек Еуропа, Канада, Бразилия, Мексика, Австралия және басқа елдерде шеберлік сабақтарын өткізіп, түрлі би жобаларына қатысқан.
Бала кезінде баскетболды жақсы көрген
Кеоне Мадридтің хореограф боламын деген нақты жоспары болмаған. Ол Сан-Диегода өскен және жасөспірім кезінде спортқа, әсіресе баскетболға қызыққан. 2012 жылғы Dance Spirit журналы оны «спортшыға тән энергиясы бар» биші ретінде сипаттап, оның алғашқы махаббаты баскетбол болғанын жазған.
Соған қарамастан, Кеоне бала кезінен биге қызығушылық танытқан. Ол Майкл Джексон, NSYNC сияқты орындаушылардың клиптеріндегі қимылдарды қайталап билейтін. Алайда кәсіби түрде би үйренуді тек 15 жасында бастады.
Бір күні досы оны хип-хоп сабағына ертіп барады. Сабақты KJ Gonzales өткізген. Бір сабақтан кейін Кеоне биге қатты қызығып, аптасына бір рет жаттығу оған жеткіліксіз екенін түсінеді. Үйіне барып, өзі хореография құрастыра бастаған.
Осылайша оның спортқа деген қызығушылығы біртіндеп биге ауысады.
Алғашқы қадамы – Future Shock San Diego
Алғашқы сабағынан кейін көп ұзамай Кеоне Future Shock San Diego би тобына қосылады. Бұл Culture Shock San Diego командасының жас бишілерге арналған тобы болатын.
Кейін ол топтың директоры атанды. Осы жерде Кеоне тек сахнада билеп қана қоймай, хореография жасауды, топ басқаруды және басқа бишілерге сабақ беруді үйренді. Ол Jabbawockeez мүшесі Райнан Пагуиодан тәлім алған.
Бастапқыда оның биі негізінен хип-хопқа сүйенсе, кейін contemporary, jazz, salsa және tango элементтерімен толықты. Кеоне мен Мари кейін Disney-ге берген сұхбатында да өздерінің негізгі базасы хип-хоп болғанын, кейін басқа би бағыттарын қосқанын айтқан.
Әлемге танылуына YouTube көмектескен
Кеоне Мадридтің халықаралық мансабындағы маңызды кезеңдердің бірі – YouTube.
Бір қызығы, ол өз хореографияларын интернетке жариялауға бастапқыда аса құлықты болмаған. Бірақ оның шәкірттерінің бірі сабақ кезінде түсірілген видеоларды YouTube-қа жүктей бастаған. Видеолар күтпеген жерден кең тарап, Кеоненің жұмысына шетелден қызығушылық пайда болады. Оның алғашқы халықаралық шақыртуларының бірі Норвегиядағы би шеберлік сабағы болған.
Осыдан кейін ол Еуропа мен Азияның түрлі елдеріне шақырылып, хореограф ретінде таныла бастайды. Яғни бүгін BTS пен Билли Айлиш секілді әлемдік жұлдыздармен жұмыс істейтін хореографтың халықаралық мансабына жол ашқан нәрсенің бірі – әлеуметтік желіге салынған қарапайым би сабақтарының видеолары.
Мари Мадридпен махаббаты да биден басталды
Кеоненің кәсіби және жеке өмірі Мари Мадридпен тығыз байланысты. Мари де – биші әрі хореограф.
Екеуі би саласында танысқан. Кейін олардың қарым-қатынасы шығармашылық серіктестікке ұласты. Dance Magazine мәліметінше, Кеоне Мариға MySpace арқылы хабарласып, одан өзінің Future Shock San Diego командасына хореография жасауға көмектесуін сұраған. Екеуі көп ұзамай жұпқа айналған.
Кейін олар Choreo Cookies би тобында бірге шамамен сегіз жыл жұмыс істеп, өздеріне тән хореографиялық стилін қалыптастырды. Олардың қойылымдарында екі адамның қозғалысы бір-бірімен өте күрделі түрде байланысып, тұтас бір оқиға секілді көрінеді.
Кеоне мен Мари 2012 жылы үйленген. Қазір олар ерлі-зайыпты ғана емес, ата-ана әрі шығармашылық серіктес. Ресми сайтында да олар «husband, wife & parents» ретінде көрсетілген.
Олардың Numah есімді қызы бар. Disney-дің «Us Again» жобасы кезінде Мари бес айлық жүкті болған, ал хореография түсірілімі кезінде олардың қызы небәрі бірнеше айлық болған. Кей кездері Кеоне мен Мари хореографияны кішкентай қыздарын қастарына алып отырып дайындаған.
Филиппиндік тамыры бар
Кеоне Мадрид – америкалық, бірақ оның шығу тегі Филиппинге байланысты. Бұл оның шығармашылығында да белгілі бір деңгейде көрініс табады.
Ол отбасынан алған құндылықтарды, ата-әжесінің өмірін және мәдени тамырын бірнеше сұхбатында айтқан. Сондықтан оны «филиппин ұлты» деп нақтылаудан гөрі, филиппиндік тамыры бар америкалық хореограф деп атаған дұрыс.
Джастин Бибер клипінде
Кеоне Мадридтің шығармашылық жолындағы ең маңызды жобалардың бірі – Джастин Бибердің «Love Yourself» әніне түсірілген клип. Кеоне мен Мари онда хореограф қана емес, негізгі орындаушылар ретінде де көрінді.
Кейін олардың жұмыстары одан әрі кеңейді. Кеоне мен Мари Disney-дің «Us Again» анимациялық қысқаметражды фильміне хореография жасады.
Бұл фильмнің ерекшелігі – оқиға диалогсыз, толығымен музыка мен би арқылы баяндалады. Disney-дің ресми материалында Кеоне мен Мари фильмнің хореографтары ретінде көрсетілген.
Фильмдегі қарт ерлі-зайыптының жас кезіндегі махаббаты мен биге деген құштарлығы Кеоне мен Маридің өз ата-әжелерінен алған шабыттарына да байланысты болған. Олар өздерін болашақта қартайған кезде де бірге билеп жүретін жұп ретінде елестететінін айтқан.
«Us Again» кейін NAACP Image Award жүлдесін алып, Кеоне мен Маридің шығармашылық мансабындағы маңызды жетістіктердің біріне айналды.
Кеоне Мадридтің жұмысы музыкалық клиптермен шектелмейді. Ол Мари екеуі театр жобаларына да белсенді араласқан.
Олардың жұмыстарының қатарында Бритни Спирс әндеріне негізделген Broadway мюзиклі «Once Upon a One More Time», «The Karate Kid» мюзиклі және «Beyond Babel» қойылымы бар. «Beyond Babel» үшін жұп Drama Desk Awards-қа хореография номинациясында ұсынылған.
Осылайша Кеоне Мадридтің мансабын тек «жұлдыздарға би қоятын хореограф» деп сипаттау аздық етеді. Ол бүгінде режиссерлік, сценарий жазу, продюсерлік және кино өндірісімен де айналысады.
Көшпенділер ойындарындағы жаңа жобасы
2026 жылы Кеоне Мадридтің есімі Орталық Азияда да кеңінен аталды. 31 тамызда Бішкекте VI Дүниежүзілік көшпенділер ойындарының ашылу салтанаты өтті. Ресми мәлімет бойынша, ойындар 31 тамыз бен 6 қыркүйек аралығында Қырғызстанда ұйымдастырылды.
Посмотреть эту публикацию в Instagram
Ашылу рәсімінің би бөлігін Кеоне Мадрид қойған. Айта кету керек, Қазақстанның «Нұр» би ансамблі ашылу салтанатындағы ауқымды хореографиялық қойылымға қатысқан және оның үстінен америкалық хореограф Кеоне Мадрид жұмыс істеген.
Қойылымға Қазақстан, Қырғызстан, Өзбекстан, Түркия және басқа елдерден бишілер мен хореографтар қатысқан. Ашылу шоуында шамамен 2 мың орындаушының болған.
Бұл жоба Кеоненің шығармашылығындағы тағы бір ерекшелікті көрсетеді: ол заманауи хип-хоп хореографиясын үлкен мәдени тақырыптармен ұштастыра алады.
Оның басты ерекшелігі – би арқылы әңгіме айту
Кеоне Мадридтің шығармашылығын өзгелерден ерекшелендіретін негізгі нәрсе – қимылдың артында оқиғаның болуы.
Ол үшін би жай ғана әдемі қозғалыстардың жиынтығы емес. Кеоне мен Мари өз жұмыстарында кейіпкердің сезімін, қарым-қатынасын және оқиғасын қозғалыс арқылы жеткізуге тырысады. Олардың ресми сайтында да дәл осы «би арқылы оқиға баяндау тәсілі» шығармашылықтарының негізі ретінде сипатталған.
Мүмкін, сондықтан оның жұмыстары әлемдік поп-мәдениетте тез танылады. Бір жағынан – хип-хоптың энергиясы, екінші жағынан – театрлық қойылымға тән драматургия. Ал бұл екеуін біріктіріп, оны Джастин Бибер, BTS, Билли Айлиш сияқты әртістердің сахнасына алып келген.
Кеоне Мадридтің тарихындағы ең қызық тұс та осында: ол бала кезінен «әлемге әйгілі хореограф боламын» деп жоспар құрмаған. Баскетболды жақсы көрген жасөспірім бір күні досының соңынан хип-хоп сабағына еріп барды. Бір сабақ кейін оның өмірлік кәсібіне айналды. Ал бүгін сол жасөспірімнің хореографиясын әлемнің ең ірі сахналарынан көруге болады.
