Economist Intelligence Unit зерттеу орталығы 2026 жылға арналған әлемдегі өмір сүруге ең қолайлы қалалардың рейтингін жариялады. Зерттеу барысында қалалардағы өмір сапасы бес негізгі көрсеткіш бойынша бағаланған. Олар – тұрақтылық, денсаулық сақтау, білім беру, инфрақұрылым, сондай-ақ мәдениет пен қоршаған орта.
Өмір сүруге ең қолайлы қалалар
Биылғы рейтингте Копенгаген 100 мүмкін ұпайдың 98-ін жинап, әлемдегі өмір сүруге ең қолайлы қала атанды. Осылайша Дания астанасы соңғы бірнеше жыл бойы көш бастап келген Венаны екінші орынға ығыстырды.
Сарапшылардың бағалауынша, Копенгагеннің көш бастауына мемлекеттік қызметтердің тиімділігі, қауіпсіз қалалық орта, қоғамдық көліктің дамуы, сапалы медициналық қызмет және экологияға ерекше көңіл бөлінуі ықпал еткен.
Екінші орынға Австрия астанасы Вена жайғасса, үшінші және төртінші орындарды Австралияның Мельбурн және Сидней қалалары иеленді.
Жалпы рейтингте Еуропа мен Австралия қалалары тағы да жоғары нәтиже көрсетіп отыр. Бұған заманауи инфрақұрылым, қолжетімді әрі сапалы денсаулық сақтау жүйесі, тиімді мемлекеттік қызметтер және тұрғындарға қолайлы қалалық орта себеп болған.
Алғашқы ондыққа Швейцарияның Цюрих пен Женева қалалары, Австралияның Аделаидасы, сондай-ақ Жапонияның Осака және Токио қалалары енді. Осака мен Токионың әрқайсысы 96 ұпай жинаған.
Солтүстік Америкадан үздік ондыққа тек Канаданың Ванкувер қаласы ғана кірді. Бұл Канаданың өмір сүруге қолайлы елдердің бірі ретіндегі беделін тағы бір мәрте айқындай түсті.
Өмір сүруге ең қолайсыз қалалар
Рейтингтің соңғы орындарында қарулы қақтығыстар, саяси тұрақсыздық, экономикалық қиындықтар және қоғамдық қызметтердің әлсіздігі тұрғындардың өмір сапасына кері әсер етіп отырған қалалар орналасқан.
Ең соңғы, 173-орынға 32 ұпаймен Сирия астанасы Дамаск жайғасты. Одан кейін Ливияның Триполи және Бангладештің Дакка қалалары тұр.
Өмір сүруге қолайсыз қалалардың қатарында Украинаның Киеві, Иранның Тегераны, Пәкістанның Карачиі және Нигерияның Лагосы да бар. Бұл қалаларда қауіпсіздік мәселелері, инфрақұрылымның жеткіліксіздігі және қоғамдық қызметтердің тиімді жұмыс істемеуі тұрғындардың күнделікті өміріне айтарлықтай әсер етеді.
