Жоғары жалақы, қымбат көлік, сәнді пәтер мен люкс өмір – IT саласында жұмыс істейтін мамандар туралы қалыптасқан негізгі стереотиптердің бірі. Алайда Meta компаниясының инженері Рэймонд Зенг бұл түсінікті түбегейлі өзгертті. Жылына 306 мың доллардан астам табыс табатын әзірлеуші барынша қарапайым өмір сүріп, ерте қаржылық тәуелсіздікке жетуді мақсат еткен.
«Спартандық» өмір салты
Бұл туралы Business Insider хабарлады. Рэймонд Зенг қазір Сан-Франциско шығанағы маңында бір бөлмелі пәтер жалдап тұрады. Ай сайынғы жалдау ақысы – 2600 доллар. Оның сөзінше, кеңсеге жақын аудандарда дәл осындай пәтер бағасы 3500 долларға дейін жетеді.
Инженердің үйінде диван да, теледидар да жоқ. Жатын бөлмесінде тек төсек, жастық, көрпе және құжаттарға арналған шағын шкаф бар. Теледидардың орнына ол компьютер пайдаланады. Достары мұндай өмір салтын «спартандық» деп атайды.
Тіпті көліктен де бас тартқан. Ол Сан-Франциско шығанағы маңындағы метро желісінің жанында тұрғандықтан, көбіне жаяу жүреді немесе компанияның қызметтік шаттлын пайдаланады. Такси мен қоғамдық көлікке айына шамамен 30 доллар ғана жұмсайды.
Негізгі мақсат – ерте зейнетке шығу
Зенгтің басты арманы – 30 жасына дейін қаржылық еркіндікке жету. Сол үшін табысының едәуір бөлігін инвестицияға бағыттайды.
Инженердің айтуынша, жеке қаржыдағы ең маңызды нәрсе – ақшаңды қайда жұмсайтыныңды дұрыс таңдау.
Жеке қаржының басым бөлігі – ақшаны неге жұмсап, неден бас тартатыныңды таңдаудан тұрады, – дейді ол.
Қазір ол қаражатының шамамен 80 пайызын АҚШ қор нарығына, ал 20 пайызын халықаралық активтерге инвестициялап отыр. Өз есебіне сүйенсек, бәрі ойдағыдай болса, 30 жасында 2 миллион доллардан астам, ал 40 жасына қарай 7 миллион доллар жинай алады.
Ай сайын мыңдаған доллар жинайды
Рэймонд Зенг табысының негізгі бөлігін жалақыдан емес, бонустар мен компания акцияларынан алады. Бұл жалпы кірісінің шамамен 60 пайызына тең.
Салық пен зейнетақы аударымдарынан кейін оның қолында орта есеппен 4000 доллар қалады. Ал ай сайын жинайтын сомасы 5 мыңнан 20 мың долларға дейін жетуі мүмкін.
Ол барлық қаржысын мұқият бақылап отырады. Ай сайын бюджетке, инвестицияға, салыққа және болашақ табыс болжамына арналған жеке кестелерін жаңартады.
Ақшаны затқа емес, әсерге жұмсайды
Қарапайым өмір сүргенімен, Зенг өзін толықтай шектемейді. Айына шамамен 400-500 долларды саяхат пен хоббиге бөледі.
Ол банк карталары мен әуе компанияларының бонустық бағдарламаларын белсенді пайдаланады. Бірде жинаған бонустары арқылы әкесі екеуіне Los Angeles қаласынан Singapore еліне бизнес-класпен ұшатын билет алған. Мұндай сапардың бағасы 5 мың доллардан асады.
Ерекше хоббиі бар инженер
Инженердің тағы бір қызығушылығы – фурри қауымдастығы. Ол түрлі кейіпкерлер ойлап тауып, арнайы арттарға тапсырыс береді және тақырыптық фестивальдерге қатысады.
Қазір Зенг арнайы костюмге ақша жинап жүр. Мұндай костюмдердің бағасы 7 мың долларға дейін барады.
Бос уақытында инженер достарымен виртуалды шынайылық платформаларында жиі кездеседі. Оның айтуынша, бұл барлар мен мейрамханаларға кететін шығынды азайтуға көмектескен.
Қарапайым өмір – тренд пе?
Соңғы жылдары әлемде FIRE (қаржылық тәуелсіздік және ерте зейнетке шығу) қозғалысы кең тарала бастады. Бұл бағытты ұстанатын адамдар табысының көп бөлігін инвестициялап, шығынды азайту арқылы ерте жаста жұмыссыз өмір сүруді мақсат етеді.
Рэймонд Зенгтің өмір салты да осы философияға жақын. Оның оқиғасы жоғары табыс міндетті түрде қымбат өмір салтын білдірмейтінін көрсетті.
