Биыл Канн фестивалі 12-23 мамыр аралығында өтеді. Дәстүр бойынша актерлер, режиссерлер, продюсерлер және киноиндустрия өкілдері Каннға жиналып, «Алтын пальма бұтағы» (Palme d’Or) жүлдесіне таласатын 21 фильмді іріктейді.
Фестиваль өтетін Круазетт жағалауында қызыл кілем төселіп, кино жұлдыздары арасында бәсеке басталады. Тек мұнда ғана емес, сұхбат барысында, қонақүйдегі фотосессия да ел аузында жүреді.
Иә, мұнда кімнің келетінін болжау қиын. Өткен жылы Рианна күтпеген жерден келіп, жұбайы A$AP Rocky-ді қолдаған еді. Оның Alaïa брендіне тиесілі ашық көйлегі кештің ең жарқын образдарының біріне айналды.
Ал 1987 жылы ханшайым Диана мен ханзада Чарльздің фестивальге келуі тарихта қалды. Диананың көгілдір шифон көйлегі сән иконасына айналған.
Биыл да назар аударатын есімдер аз емес. Қазылар алқасының құрамында Деми Мур, Хлоя Чжао және Рут Негга бар. Ал фестивальге Адам Драйвер, Скарлетт Йоханссон, Кристен Стюарт, Джулианна Мур, Кейт Бланшетт, Алисия Викандер, Тейлор Расселл, Ренате Рейнсве, Хавьер Бардем, Рами Малек және Ребекка Холл сынды жұлдыздар қатысады.
Әсіресе, Деми Мурдың қай образын алып қарасақ та, таңданбасқа болмайды.
Канн қызыл кілеміндегі ең үздік образдарды назарларыңызға ұсынамыз. Мұнда Шарлотта Dior-дың салмақты костюмін кисе, Барбара Палвин Ella Mae брендінің көйлегін киген.
Шарлотта Ле Бон, актриса, модель
Барбара Палвин, модель
Атақты актриса Джулианна Мур әдемі қызыл көйлекті таңдаса, актриса әрі сценарист Хлоя Чжаоның екі образы да көпшілікке ұнады. Бірінде батыл әйелдің образын жөн көрсе, екіншісінде жұмбақ шығыс сұлуы болуды қалаған.
Джулианна Мур, актриса
Хлоя Чжао, актриса әрі сценарист
Наоми Кинг Канн ашық күлгін түсті көйлек кисе, Кара Делевинь әдетінше қара-көк шақпақ смокинг киіп келген. Бұл – Караның фестивальдегі екінші образы.
Леа Сейду мен блогер Мая Малнер фестивальге ерекше көрік берді. Қос сұлудың образы ертегідегі ханшайымды еске түсіреді.
Леа Сейду, актриса әрі модель
Мая Малнар, блогер
Актриса Джордано Брюстер образдағы шик элементін жакет-шалбармен әдемі үйлестірген. Актрисаның макияжы да киімнің өңін ашып тұр. Блогер Ума Джамме болса Дисней ханшайымы болуды таңдаған екен.
Джордано Брюстер, актриса
Ума Джамме, блогер
Кинофестиваль 23 мамырға дейін жалғасатындықтан, әдемі образдарға әлі де шолу жасаймыз.
