Jetour бренді рамалы жол талғамайтын G700 моделінің жаңартылған нұсқасын таныстырды. Қытайда жаңа көліктің сатылымы басталды. Жол талғамайтын көлік сыртқы дизайнын өзгертіп қана қоймай, жүргізушіге көмек көрсету жүйесін жетілдіріп, қуаты жоғары аккумулятор алды.
Жаңартылған Jetour Zongheng G700 өткен аптада ресми түрде таныстырылған болатын. Енді Қытайда модельдің тұсаукесері өтіп, сатылымы басталды.
Zongheng — Chery компаниясына тиесілі Jetour бренді ішіндегі толыққанды жол талғамайтын көліктер мен пикаптарға арналған жеке желі. Бір қызығы, бастапқы G700 нарыққа былтыр ғана шыққан. Сондықтан жаңа нұсқаның бұрынғы модельді толық алмастыратыны немесе қатар ұсынылатыны әзірге нақты емес.
Дизайны өзгерді
Жаңартылған G700-дің сыртқы келбеті заманауи сипатқа ие болды. Көлік жаңа алдыңғы бампермен жабдықталған. Енді ол кузов түсіне боялады. Дөңгелек аркаларындағы ірі қорғаныс элементтері мен артқы бампер де кузов түсінде орындалған.
Радиатор торының дизайны да өзгерді. Оның жаңа нұсқасында ірі күміс түсті сәндік элементтер бар.
Сонымен қатар жол талғамайтын көлікке жаңа дөңгелек дизайны ұсынылады. Дөңгелектердің өлшемі — 18 немесе 20 дюйм.
Көліктің жалпы өлшемдері өзгеріссіз қалған. Оның ұзындығы — 5198 мм, ені — 2050 мм, биіктігі — 1956 мм, ал дөңгелек базасы — 2870 мм.
Алайда клиренсі аздап төмендеген. Жаңартылған G700-дің жол саңылауы 220 мм, ал бұрынғы нұсқада бұл көрсеткіш 230 мм болған.
Салонында үлкен экрандар бар
Интерьердің жалпы архитектурасы сақталған. Бірақ 2027 модельдік жылдағы G700 салонында қара түсті пластик қолданылмайды.
Алдыңғы панельде үш спицалы руль және панельдің еніне жуық орналасқан 35,4 дюймдік экран бар. Сонымен қатар мультимедиялық жүйеге арналған жеке 15,6 дюймдік дисплей орнатылған.
Орталық тоннельде физикалық басқару батырмалары, сымсыз қуаттауға арналған бір немесе екі алаң, қозғалыс режимдерін таңдауға арналған айналмалы басқару тетігі және ашық стақан қойғыштар орналасқан.
Көлік бұрынғыдай бес немесе алты орындық нұсқада ұсынылады.
Жабдықталуы кеңейтілді
Жаңартылған G700-дің базалық жабдықтарының қатарына алдыңғы және екінші қатар орындықтарын жылыту, алдыңғы орындықтарды желдету, екі аймақты климат-бақылау және жан-жағын көрсететін камералар кіреді.
Сонымен қатар көлікте адаптивті круиз-бақылау және жолақта ұстау жүйесі қарастырылған.
Қымбат нұсқаларда бірінші және екінші қатар орындықтарына массаж функциясы, екінші қатар орындықтарын желдету және артқы жолаушыларға арналған 17,3 дюймдік төбелік планшет ұсынылады.
Топтық комплектациялардың басты ерекшеліктерінің бірі — Huawei компаниясының ADS 5 жүргізушіге көмек көрсету жүйесі.
Ол алдыңғы әйнектің үстіндегі лидармен жабдықталған. Жаңа модельдегі лидарда 892 сәулелік жол бар. Салыстыру үшін, жаңартуға дейінгі G700-дің қымбат нұсқаларында 192 сәулелік лидар қолданылған.
904 ат күші және жаңа батарея
Jetour Zongheng G700 бұрынғыдай толық жетекті қайта зарядталатын гибрид болып қала береді.
Гибридті жүйеге 2,0 литрлік 211 ат күші бар турбомотор және екі электр қозғалтқышы кіреді.
Жүйенің жиынтық қуаты өзгермеген — 904 ат күші, ал максималды айналу моменті 1135 Нм.
Негізгі нұсқалар бұрынғы 34,13 кВт·сағ аккумуляторды сақтап қалған. Мұндай көлік тек электр қуатымен CLTC циклі бойынша 150 шақырымға дейін жүре алады.
Ал қымбатырақ екі нұсқа жаңа, сыйымдылығы 59,45 кВт·сағ аккумулятор алады. Соның арқасында электрлі жүріс қоры 260 шақырымға дейін ұлғайған.
Пневматикалық аспа енді тек ең қымбат нұсқада ғана қолжетімді. Бұған дейін ол орташа комплектацияларда да ұсынылған.
Бағасы қанша?
Қытайда жаңартылған Jetour Zongheng G700-дің бағасы акцияларды есептемегенде 329 900–442 900 юань аралығында. Бұл шамамен 4,15–5,57 миллион рубльге тең.
Бұрынғы G700 Қытайдан тыс нарықтарға жай ғана Jetour G700 атауымен экспортталады. Компания бұған дейін рамалы жол талғамайтын көлікті Қазақстан нарығына да шығаруды жоспарлағанын хабарлаған еді.
Алайда әзірге Jetour G700 Қазақстанда ресми түрде сатылымға шыққан жоқ.
