Оңтүстік Кореяның Hyundai компаниясы Elantra N спортседанының Monochrome деп аталатын жаңа нұсқасын ұсынды. Жаңа модификацияның басты ерекшелігі — экстерьеріндегі ұстамды дизайн мен қара түсті сәндік элементтер. Ал модельдің жаңа буындағы Hyundai Elantra N нұсқасы 2027 жылы жарық көреді деп күтілуде.
Hyundai Elantra моделі алғаш рет 1990 жылы таныстырылған. Содан бері седан жеті рет буынын жаңартты. 2026 жылдың маусым айының соңында модельдің сегізінші буыны таныстырылып, тамыздың басында сатылымға шықты. Оңтүстік Кореяның ішкі нарығында бұл көлік Avante атауымен сатылады, ал басқа елдерде Elantra деген атпен белгілі.
Алдыңғы буындағы Elantra-ның спорттық N нұсқасы жоғары өнімділігімен ерекшеленеді. Компания осындай модификацияны жаңа буынға да ұсынуды жоспарлап отыр. Оның таныстырылымы 2027 жылға белгіленген.
Әзірге өндіруші қазіргі спортседаннан бас тартуға асығар емес. Осыған байланысты Hyundai Elantra N моделінің Monochrome деп аталатын жаңа нұсқасы пайда болды.
Сыртқы келбеті қалай өзгерді?
Monochrome нұсқасының негізгі жаңалығы — сыртқы дизайнының барынша ұстамды болуы. Көліктің төменгі бөлігіндегі және доңғалақтар маңындағы ашық түсті сәндік акценттер алынып тасталған. Олардың орнына кузов түсіне сәйкес элементтер қолданылған, ал тежегіш суппорттары қара жылтыр түске боялған.
Жаңа модификация екі түсте ұсынылады: Abyss Black Pearl қарасы және Performance Blue көгі.
Сондай-ақ седанға ерекше дизайндағы соғылған дискілер, алдыңғы және артқы бамперлердің аздап өзгертілген бөлшектері орнатылған. Артқы бөлігіндегі спойлер мен бүйірлік айналардың корпустары көміртекті талшықтан жасалған.
Салонның безендірілуі де жаңарған. Ішкі әрлеуде қара түсті алькантара, көк тігістер мен көк сәндік кірістірулер қолданылған. Руль дөңгелегі де алькантарамен қапталып, қара түсті батырмалармен жабдықталған.
Қозғалтқышы мен техникалық сипаттамалары
Hyundai Elantra N Monochrome-ның техникалық жабдықталуы стандартты спорттық нұсқамен бірдей.
Модельге 2,0 литрлік T-GDI турбокомпрессорлы бензин қозғалтқышы орнатылған. Оның қуаты — 280 ат күші. NGS жүйесі іске қосылғанда көрсеткіш 290 ат күшіне дейін жетеді. Максималды айналу моменті — 392 Нм. Қозғалтқыш екі түрлі беріліс қорабымен ұсынылады:
- сегіз сатылы қос іліністі DCT автоматты беріліс қорабы;
- алты сатылы механикалық беріліс қорабы.
Автокөліктің жетекші дөңгелектері — алдыңғы. Сонымен қатар модель электронды басқарылатын өздігінен бұғатталатын дифференциалмен жабдықталған. Бұл жүйе бұрылыстарда тарту күшін тиімді бөлуге көмектеседі.
Қай елдерде сатылады?
Hyundai компаниясының баспасөз қызметінің мәліметінше, Elantra N Monochrome Оңтүстік Кореяда, Канадада, Аустралияда және басқа да бірқатар халықаралық нарықта ұсынылады.
Жаңа нұсқаның бағасы әзірге жарияланған жоқ. Салыстыру үшін, Оңтүстік Корея нарығындағы стандартты Hyundai Avante N моделінің қазіргі бағасы шамамен 11,7 млн теңге. Ал сегізінші буындағы стандартты Hyundai Avante-ның бензинді нұсқасы шамамен 8,4 млн теңгеден, ал гибридті модификациясы 10,6 млн теңгеден басталады.
Осылайша, Hyundai Elantra N Monochrome техникалық мүмкіндіктерін өзгертпей, сыртқы келбеті мен салонын жаңа стильде ұсынатын спортседан ретінде ерекшеленеді. Ал модельдің келесі буындағы N нұсқасы 2027 жылы таныстырылуы мүмкін.
