Google компаниясы Gemini 4 жасанды интеллект моделін көпшілікке ұсынуға дайындалып жатқанда, оның анағұрлым жетілдірілген нұсқаларын да сынақтан өткізіп жатыр.
Business Insider мәліметінше, компания қызметкерлері Carbon деген кодтық атауы бар жаңа модельді тексеруге кіріскен. Ол бағдарламалау саласында Google-дің бәсекелестерінен қалыспауына мүмкіндік беруі мүмкін.
Басылым дерегіне сүйенсек, Carbon моделі бірнеше күн бұрын Google қызметкерлеріне арналған Jetski ішкі платформасында қолжетімді болған. Бұл платформа бағдарламалық код жазу үшін пайдаланылады.
Компания қызметкерлерінің бірі Carbon-ның бағдарламалау тапсырмаларын орындау қабілетін Anthropic әзірлеген Claude Opus 5.5 моделімен салыстырған. Оның айтуынша, екі модельдің жұмыс істеу деңгейі ұқсас. Дегенмен ол нақты қорытынды жасау үшін Carbon-ды ұзағырақ сынау қажет екенін атап өткен.
Claude Opus 5.5 – Anthropic компаниясының күрделі бағдарламалау тапсырмаларын, соның ішінде жасанды интеллект агенттері арқылы код жазу жұмыстарын орындауға арналған ең қуатты модельдерінің бірі.
Google бірнеше нұсқаны қатар сынап жатыр
Google өткен айдың соңында Gemini 4 модельдерінің жаңа буынын әзірлеп жатқанын хабарлаған еді. Қазір компания олардың бірнеше нұсқасын ішкі сынақтан өткізуде.
Business Insider дерегінше, жаңа модельдер Argon, Barium және Carbon деген кодтық атаулармен әзірленген.
Қызметкерлер алғаш сынаған Argon нұсқалары жалпы оң бағаланған. Алайда кейбір мамандар оның бағдарламалық код жазуға қатысты жекелеген тапсырмаларда бәсекелес компаниялардың озық модельдерінен қалып қойғанын байқаған.
Ал Carbon секілді жетілдірілген нұсқалар бұл айырмашылықты азайтуы мүмкін. Дегенмен Google сынақтан өткен модельдердің барлығын көпшілікке ұсынады деген сөз емес.
Компанияның ішкі құжаттарының бірінде Barium-B нұсқасы Argon атауымен жарияланатын модель ретінде таңдалғаны көрсетілген. Google-да әзірлеу барысында қолданылатын кодтық атаулар өнімнің ресми атауымен сәйкес келе бермейді.
Сондықтан Carbon-ның болашақта Argon моделінің жаңартылған нұсқасы ретінде ұсынылатыны немесе Gemini топтамасындағы жеке модель болатыны әзірге белгісіз.
Жаңа модельдің басты ерекшелігі қандай?
Google бұған дейін Argon моделі бағдарламалау, құқық және қаржы салаларына қатысты күрделі тапсырмаларда жетекші жасанды интеллект жүйелерімен салыстыруға болатын нәтижелер көрсеткенін мәлімдеген.
Компанияның айтуынша, модельді әзірлеу кезінде киберқауіпсіздік мәселесіне ерекше көңіл бөлінген.
Осыған байланысты Argon бірден барлық пайдаланушыға қолжетімді болмайды. Алдымен модель Google-дің Fairwind бағдарламасына қатысатын серіктестеріне ұсынылады. Бұл бастама жаңа жасанды интеллект жүйелеріндегі осал тұстарды анықтауға бағытталған.
Қауіпсіздік тексерулерінен кейін модельді көпшілікке ұсыну жоспарланып отыр. Алайда оның нақты қашан іске қосылатыны әзірге хабарланған жоқ.
Жасанды интеллект нарығындағы бәсеке күшейіп келеді
Google-дің жаңа модельдерді белсенді сынақтан өткізуі жасанды интеллект саласындағы бәсекенің күшейгенін көрсетеді.
Қазір технологиялық компаниялар тек сұрақтарға жауап беретін чат-боттарды емес, адамның тапсырмасын өздігінен орындауға қабілетті ЖИ агенттерін дамытуға басымдық беріп отыр.
Мұндай жүйелер бағдарламалық код жаза алады, қателерді анықтап, түзете алады және күрделі инженерлік жұмыстардың бірнеше кезеңін адамның тұрақты араласуынсыз орындай алады.
Бұл бағытта Anthropic пен OpenAI жетекші ойыншылардың қатарында. Google де жаңа Gemini модельдері арқылы бағдарламалауға арналған ЖИ құралдары нарығындағы орнын нығайтуға ұмтылып отыр.
Осы аптада компания Gemini негізінде жұмыс істейтін, күнделікті қызметтік тапсырмаларды орындауға арналған жаңа әмбебап ЖИ агентін де таныстырды.
Дегенмен Google-дің алдағы бәсекедегі мүмкіндігі Gemini 4-тің ішкі сынақтардағы нәтижесіне ғана емес, оның көпшілікке ұсынылғаннан кейінгі нақты жұмысына да байланысты болмақ. Carbon әзірге компания ішінде сыналып жатқандықтан, оның бәсекелес модельдерден қаншалықты озық екенін тәуелсіз бағалау мүмкін емес.
