Қазақстан Ұлттық олимпиада комитетінің президенті әрі World Boxing ұйымының басшысы Геннадий Головкин украиналық «Миротворец» сайтының деректер базасына енгізілді.
Ресурстағы мәлімет бойынша, қазақстандық боксшы туралы ақпарат 15 тамызда жарияланған. Бұған Головкин басқаратын World Boxing ұйымының ресейлік боксшылардың халықаралық жарыстарға қатысу тәртібіне қатысты қабылдаған шешімі себеп болған.
Шешім ресейлік боксшыларға қатысты
World Boxing бұған дейін ресейлік спортшыларға қойылған бірқатар шектеуді алып тастап, олардың халықаралық турнирлерде Ресейдің туы мен әнұранын пайдалануына рұқсат берген еді. Осыдан кейін «Миротворец» ресурсында Головкинге қатысты жеке парақша пайда болды. Онда оның World Boxing президенті ретіндегі қызметі мен ұйымның ресейлік спортшыларға қатысты шешімі көрсетілген.
Бұл ретте «Миротворец» Украина мемлекеттік органдары жүргізетін ресми санкциялық тізім емес. Сондықтан аталған базаға енгізілу Головкинге Украина билігі тарапынан ресми айып тағылды немесе қандай да бір құқықтық шектеу енгізілді дегенді білдірмейді.
Головкиннің World Boxing-тегі қызметі
Геннадий Головкин World Boxing ұйымының президенті болып 2025 жылдың қарашасында сайланды. Ал 2024 жылдан бері Қазақстан Ұлттық олимпиада комитетін басқарады.
GGG кәсіпқой бокстағы мансабында орта салмақтың басты жұлдыздарының біріне айналды. Ол әлем чемпионы атағын бірнеше нұсқа бойынша иеленіп, 45 жекпе-жектің 42-сінде жеңіске жетті. Екі кездесуді тең аяқтап, бір рет жеңілген. 2026 жылы Геннадий Головкин Халықаралық бокс даңқ залының мүшесі атанды.
