Америкалық Ford компаниясы саяхат пен жолсыз жерлерге арналған Expedition Tremor Overland шоу-карын әзірледі. Толық өлшемді жол талғамайтын көлік бір ғана экземплярмен шектеледі және сериялық өндіріске шықпайды.
Ford компаниясы Expedition жол талғамайтын көлігін 1996 жылдан бері шығарып келеді. Оның бесінші буыны 2024 жылдың қазан айында таныстырылып, 2025 жылдың басында АҚШ нарығына шықты. Қазіргі модель қатарында Tremor нұсқасы да бар.
Компания жаңа Expedition Tremor Overland жобасын 2026 жылғы 12 қарашада жариялады. Көліктің көпшілік алдындағы тұсаукесері қараша айының соңында Лос-Анджелестегі көрмеде өтеді. Жоба Ford Design және Ford Customization мамандарының, сондай-ақ Fox Factory Vehicles компаниясының қатысуымен әзірленген.
Шоу-кар 2025 модельдік жылғы Expedition Tremor негізінде жасалған. Оған бедлоктары бар қара түсті Raptor R дискілері мен BFGoodrich All-Terrain T/A KO2 жол талғамайтын шиналары орнатылған. Сондай-ақ алдыңғы бөлігіне лебедка бекіткіші бар F-150 Tremor бампері, Raptor үлгісіндегі табалдырықтар және жаңартылған сырғанауға қарсы қорғаныштар қойылған.
Көліктің аспасы Fox 2.0 Performance амортизаторлары бар койловерлермен жаңартылған. Екі дюймдік көтеру жиынтығының арқасында клиренсі 269 миллиметрге дейін ұлғайған.
Expedition Tremor Overland қосымша жарықтандыруы бар төбелік жүксалғышпен, Yakima SkyRise HD жиналмалы шатыр-шатыршасымен, баспалдақпен және бүйірлік қалқамен жабдықталған. Қозғалтқыштың аралық салқындату жүйесі де жетілдірілген. Ақ түсті шанағы ерекше графикамен және қызғылт сары түсті бөлшектермен безендірілген.
Компания бұл жобаны әзірге тәжірибелік шоу-кар ретінде қарастырады. Дегенмен Ford тұтынушылардың пікірін зерттеп, болашақта марка автомобильдерінің қандай бағытта дамуы мүмкін екенін бағаламақ.
АҚШ нарығында 2027 модельдік жылғы стандартты Ford Expedition бағасы 63 920 доллардан басталады. Бұл шамамен 28,4 миллион теңгеге тең. Tremor нұсқасының бастапқы құны – 82 720 доллар немесе шамамен 36,8 миллион теңге. Ал ең жоғары жинақтамасы 83 015 доллардан басталып, шамамен 36,9 миллион теңге тұрады.
