Шымкентте жедел медициналық жәрдем қызметі жаңа цифрлық жүйеге көшті. Енді шақыртуға шығатын дәрігерлер мен фельдшерлер арнайы смарт-бейнежетондармен жұмыс істейді. Осылайша мегаполис жедел жәрдем бригадаларын толықтай бейнетіркегіш құрылғылармен қамтамасыз еткен Қазақстандағы алғашқы қала атанды.
Қалалық әкімдіктің мәліметінше, медицина қызметкерлеріне барлығы 240 смарт-бейнежетон табысталған. Жоба қалалық жедел медициналық жәрдем станциясы мен «Қазақтелеком» компаниясының бірлескен жұмысы аясында жүзеге асырылды. Жүйені толық енгізер алдында құрылғылар үш ай бойы пилоттық режимде сынақтан өткен. Нәтижесінде технологияның тиімділігі дәлелденіп, барлық бригадаларға кезең-кезеңімен таратылған.
Жаңа құрылғылар шақырту кезінде болған оқиғаларды бейне және дыбыс форматында тіркейді. Сонымен қатар қызметкерге қауіп төнген жағдайда арнайы дабыл батырмасын басу арқылы жедел хабарлама жіберуге мүмкіндік береді. Жиналған ақпарат арнайы орталықта сақталып, қажет болған жағдайда даулы жағдайларды қарау кезінде пайдаланылмақ.
Бұл жүйе медицина қызметкерлерінің қауіпсіздігін арттырып қана қоймай, науқастар мен дәрігерлер арасындағы түсініспеушіліктерді объективті бағалауға көмектеседі. Әсіресе соңғы жылдары жедел жәрдем қызметкерлеріне қатысты түрлі құқық бұзушылықтар мен шабуылдардың жиілеуі мұндай шешімдердің қажеттілігін көрсетіп отыр.
Денсаулық сақтау министрлігінің дерегіне сәйкес, 2019 жылдан бері елімізде медицина қызметкерлеріне қатысты 280 шабуыл тіркелген. Тек соңғы жылдары мұндай оқиғалардың саны бірнеше есе артқан. Биылдың өзінде дәрігерлерге, орта медициналық персоналға және жедел жәрдем жүргізушілеріне ондаған шабуыл жасалған. Осыған байланысты Қазақстанда медицина қызметкерлеріне күш көрсеткендерге қатысты жауапкершілік күшейтіліп, кей жағдайларда 12 жылға дейін бас бостандығынан айыру жазасы қарастырылған.
Жедел жәрдем саласында биыл тағы бірқатар өзгеріс қолға алынуда. Үкіметтің мәліметінше, 2026 жылдан бастап жедел медициналық жәрдем қызметкерлерінің жалақысын кезең-кезеңімен арттыру және олардың құқықтық қорғалуын күшейту шаралары жүзеге асырылуда. Бұл сала мамандарының әлеуметтік жағдайын жақсартып, кадр тапшылығын азайтуға бағытталған.
Шымкентте енгізілген смарт-бейнежетондар жүйесі алдағы уақытта еліміздің басқа өңірлеріне де таралуы мүмкін. Егер жоба тиімділігін көрсетсе, бұл тәжірибе Қазақстандағы жедел жәрдем қызметінің қауіпсіздігі мен ашықтығын арттырудың жаңа стандартына айналуы ықтимал.
