Елена Рыбакина әлемнің 9-ракеткасын ұтты
Қарсыластар осыған дейін екі рет кездесіп, бір-бірден жеңіске жеткен еді.
Қазақстанның бірінші, әлемнің 25-ракеткасы Елена Рыбакина Цинциннати (АҚШ) WTA 1000 турнирінің үшінші айналымына шықты, деп хабарлайды EL.KZ ҚазАқпаратқа сілтеме жасап.
Қазақстандық теннисші екінші айналымда әлемнің 9-ракеткасы, «Үлкен дулыға» жарыстарының (Ролан Гаррос - 2016, Уимблдон - 2017) екі дүркін чемпионы, испаниялық Гарбинье Мугурусамен шеберлік байқасты.
Қарсыластар осыған дейін екі рет кездесіп, бір-бірден жеңіске жеткен еді.
Бұл жолы Уимблдон додасының биылғы жеңімпазы Е.Рыбакина бірінші партияда 5:1 есебімен алға кетті. Г.Мугуруса бір брейк жасағанымен, Елена сетті өз пайдасына шешті - 6:3.
Екінші партияда да Рыбакина 3:1 есебімен алға шықты. Тағы бір брейк - 4:1. Ақыры матчты тағы бір брейкпен тәмамдады - 6:1.
Елена Рыбакина үшінші айналымда әлемнің 29-ракеткасы, америкалық Элисон Рискемен кортқа шығады. Жуырда дәл осындай Торонто турнирінде Э.Рискені Юлия Путинцева ұтқан еді.
Еске сала кетейік, бұдан бұрын Дэвис кубогінде Қазақстанмен ойнайтын командалардың құрамы анықталған болатын.
Сондай-ақ Қазақстанда алғаш рет мүгедек арбасындағы теннистен ел чемпионаты өтеді.
Қысқа да нұсқа. Жазылыңыз telegram - ға