Бір жарым жылда 110 маман кеткен: депутат әлеуметтік орталықтардағы жағдайды айтты

Бір жарым жылда 110 адам жұмыстан кеткен. Былтыр 53 қызметкер шықты, биыл тағы сонша. Қазір маман жетіспейді. Ертең бұл балаларды кім қарайды? – деді депутат.

Нартай Аралбайұлының сөзінше, бұл – бір ғана орталықтағы жағдай. Ал еліміз бойынша 500-ден астам әлеуметтік орталық бар, онда 10 мыңнан астам қызметкер еңбек етеді. Бірақ олардың басым бөлігінде проблема бірдей – жалақы төмен, кадр тұрақтамайды.

Біз лайықты жалақы төлемей, сапалы қызмет көрсететін орталық құра алмаймыз. Қанша грант бөлсек те, жастар бұл салаға келмейді, – деді ол.

Оның айтуынша, әлеуметтік қызметкерлердің жұмысы оңай емес. Бұл салада еңбек ету үшін тек білім емес, үлкен шыдам мен психологиялық дайындық қажет. Алайда қазіргі еңбекақы бұл жүктемеге сай келмейді. Осыған байланысты ол әлеуметтік қызметкерлердің жалақысын көтеруді және еңбек жағдайын жақсартуды ұсынды. Сонымен қатар үйде қызмет көрсететін мамандардың жұмыс уақытын аптасына 30 сағаттан асырмау туралы бастама да көтерілген.

Бұл – адамның жүйкесіне салмақ түсіретін жұмыс. Сондықтан еңбек шарттарын қайта қарау керек, – деді депутат.

Нартай Аралбайұлының пікірінше, ерекше балаларға көрсетілетін көмекті жақсарту үшін тек инфрақұрылым жеткіліксіз. Ең алдымен, осы салада жұмыс істейтін мамандарға жағдай жасау қажет.

Әлеуметтік жағдайды, жалақыны, мамандарды дайындауды бірге қарастырмасақ, бұл мәселені шеше алмаймыз, – деді ол.