Британдық люкс автокөлік өндірушісі Bentley алғашқы толық электрлі моделін таныстырды. Torcal деп аталатын жаңа кроссовер 888 ат күшіне дейін қуат өндіреді және бір қуатта 600 шақырымға дейін жүре алады.
Bentley электромобиль жасау жоспарын бірнеше жыл бұрын бастаған. Компания 2017 жылы Bentayga моделінен төмен орналасатын шағын электрлі кроссовер шығаруды қарастырған еді. Ал 2024 жылы алғашқы электромобильінің 2026 жылы нарыққа шығатынын ресми түрде растады. Нәтижесінде компания таңдаған модель сәнді әрі қалалық кроссовер форматында ұсынылды.
Дизайны қандай?
Ұзындығы шамамен бес метр болатын Torcal Bentley-дің ең қысқа төрт есікті моделі саналады. Дегенмен көлемі шағын емес: көліктің жүксалғышы 460 литр.
Көліктің дизайнында ұзартылған дөңгелек базасы мен қысқа асуларға басымдық берілген. Алдыңғы бөлігінде ромб тәрізді өрнегі бар жарықтандырылатын жаңа радиатор торы орналасқан. Оның дизайны Bentley-дің Continental T моделін еске түсіреді.
Torcal – компанияның жаңартылған эмблемасы қолданылған алғашқы Bentley көлігі.
888 ат күші қаншалықты жылдам?
Bentley жаңа электромобилін екі нұсқада ұсынады.
Torcal нұсқасының қуаты – 821 ат күші. Ол 0-ден 100 км/сағ жылдамдыққа 3,3 секундта жетеді. Максималды жылдамдығы – 249 км/сағ.
Ал Torcal S нұсқасы 888 ат күшін береді. Ол 100 км/сағ жылдамдыққа небәрі 2,8 секундта жетіп, ең жоғары 261 км/сағ жылдамдықпен қозғала алады.
Екі нұсқада да екі электр қозғалтқышы бар. Қозғалтқыштардың әрқайсысы көліктің бір осіне орнатылған. Сонымен қатар модель бұғатталатын артқы дифференциалмен жабдықталған.
Қызығы, бұл көрсеткіштер Bentley-дің бұған дейін айтқан жоспарларынан төмен. 2022 жылы компанияның сол кездегі бас директоры Эдриан Холлмарк алғашқы электромобильдің қуаты 1400 ат күшіне жетіп, 100 км/сағ жылдамдыққа шамамен 1,5 секундта үдейтінін мәлімдеген болатын.
Бір қуатта қанша шақырым жүреді?
Torcal-ға 113 кВт/сағ пайдалы сыйымдылығы бар аккумулятор орнатылған. Батарея 192 литий-ионды ұяшықтан тұрады және 800 вольттық жүйемен жұмыс істейді.
Өндірушінің мәліметінше, электромобиль бір қуатпен 600 шақырымға дейін жүре алады.
Ал жылдам зарядтау мүмкіндігі де назар аударуға тұрарлық. Аккумуляторды 10%-дан 80%-ға дейін толтыруға 20 минуттан аз уақыт қажет.
Компания аккумуляторға 10 жыл немесе 160 мың шақырымға дейін кепілдік береді.
Осылайша, Bentley ондаған жыл бойы іштен жанатын қозғалтқыштарымен танылғаннан кейін электрлі көлік нарығына жаңа модельмен қадам басып отыр. Torcal арқылы бренд дәстүрлі сән-салтанатты электрлі қозғалтқыш технологиясымен үйлестіруге тырысты.
