Астанада тегін Open Air концерт өтіп жатыр
Бүгін Астанада қала күніне арналған тегін Open Air концерт басталды, деп хабарлайды El.kz интернет порталы.
Сағат 18:00-де “Астана Арена” мен “Қазақ елі” монументі алаңдарында үлкен мерекелік кеш ұйымдастырылды. Ашық аспан астында өткен концертке қала тұрғындары мен қонақтар көптеп жиналды.
Биыл елордамыз Астанаға 27 жыл! Осы ерекше күнді халық ерекше көңіл-күймен атап өтуде. Сахнада отандық танымал әншілер мен өнер ұжымдары өнер көрсетіп жатыр. Ән, би, шапалақ – бәрі осы кеште бар. Кеш тегін болғандықтан, алаңға келген адам өте көп.
Көп тұрғындар концерттің ұйымдастырылуына дән риза екенін айтып, мұндай кештердің елордада жиі өтіп тұрғанын қалайтынын жеткізді. Атмосфера ерекше, мереке шынайы сезіліп тұр дейді. Атыраудан арнайы келген бір тұрғын:
Астанаға бірінші рет келдім. Осындай ауқымды концертке тап болғаныма қуаныштымын. Халық көп, бәрі күліп жүр. Бұл атмосфераны сөзбен жеткізу қиын, бәрі тамаша өтіп жатыр!, - деді.
Тағы бір тұрғын өз тілегін былай жеткізді:
Қала жылдан жылға көркейіп келеді. Бейбітшілік пен бірлік болсын. Еліміз аман, жұртымыз тыныш болсын!
Осылайша, қала тұрғындары мен қонақтары Астана күніне орай жақсы тілектерін білдіріп, мерекелік кештен ерекше әсер алғандарын айтты.
Астана — ел жүрегі. 27 жылдың ішінде талай биікті бағындырған қала бүгінде елдің мәдени, саяси және экономикалық орталығына айналды. Қала күнін тойлау — бұл ел дамуына, бірлікке және болашаққа деген сенімнің көрінісі.
Қысқа да нұсқа. Жазылыңыз telegram - ға
Оқи отырыңыз 
