Аршалы ауданында темір-бетон зауыты іске қосылды
Аталған зауыт 240 адамды жұмыспен қамтып отыр
Ақмола облысына қарасты Аршалы ауданында темір-бетон бұйымдарын шығаратын зауыт ашылды, деп хабарлайды El.kz Ақмола облысы әкімінің баспасөз орталығына сілтеме жасап.
Жаңа кәсіпорын жол плиталарын, баспалдақтарды, темірбетон линтельдерін, панельдік едендерді және іргетас блоктарын шығарумен айналысады.
Зауытты ашуға қатысқан облыс әкімі Ермек Маржықпаев құрылыс материалдарын өндіру – Ақмола облысының өңдеу өнеркәсібінің маңызды бағыттарының бірі екенін атап өтті.
Сонымен қатар зауыт жылына 456 600 шаршы метр өткір мұрынды қадаларды және 650 000 шаршы метр көп қуысты плиталар шығаруды жоспарлап отыр.
«Біздің құрылыс компаниясы тек сапалы құрылыс материалдарын қолданады. Болашақта жоспар көп. Осымен тоқтап қалмай, әрі қарай да жаңа жобалармен жұмыс жасайтын боламыз», - деді елордалық компанияның құрылыс бойынша директоры Төлеген Рахметов.
Өңірде құрылыс индустриясы саласында 100-ден астам кәсіпорын жұмыс істейді. Кәсіпорындар цемент, кірпіш, минералды жүн плиталарын, пластмассадан жасалған құбырларды, темірбетон бұйымдарын өндіруді жүзеге асырады, сондай-ақ қиыршық тас құм өндірумен айналысады.
Суреттер: Ақмола облысы әкімінің баспасөз қызметі
Қысқа да нұсқа. Жазылыңыз telegram - ға