Антикор басшысы Ирактың Қазақстандағы уақытша сенімді өкілімен кездесті
Сыбайлас жемқорлыққа қарсы қызметінің төрағасы Асхат Жұмағали Ирак Республикасының Қазақстандағы уақытша сенімді өкілі Джабер әл-Темимимен екіжақты кездесті, деп хабарлайды El.kz ақпарат агенттігі.
Кездесу барысында жемқорлыққа қарсы іс-қимыл саласындағы өзара ынтымақтастық мәселелері талқыланды.
Асхат Жұмағали Қазақстанда жүргізіліп жатқан жемқорлыққа қарсы реформаларға шолу жасап, Ирак тарапын Агенттік қызметінің негізгі бағыттарымен, оның ішінде 2022-2026 жылдарға арналған сыбайлас жемқорлыққа қарсы саясат тұжырымдамасын іске асырумен таныстырды.
Ирак тарапы жемқорлыққа қарсы іс-қимылдың қазақстандық тәжірибесін зерделеуге және бейімдеуге, сондай-ақ ведомствоаралық және мемлекетаралық деңгейлерде екі елдің елшіліктері арқылы бірлескен жобаларды дамытуға және өзара іс-қимылды нығайтуға қызығушылық білдірді.
Агенттік мәліметінше, тараптар әріптестікті нығайтудың, тәжірибе алмасудың және сыбайлас жемқорлыққа қарсы шаралардың ашықтығы мен тиімділігін арттыру жөніндегі бастамалармен бірлесіп жұмыс істеудің маңыздылығын атап өтті.
Қысқа да нұсқа. Жазылыңыз telegram - ға