Жыныстық құлдықта болған оқушы ісі: тоғыз адам сотталды

Қызылордада сексуалдық құлдықта болған 16 жастағы оқушының ісі бойынша сот үкімі шықты, деп хабарлайды El.kz ақпарат агенттігі.

Қызылорда облысының кәмелетке толмағандардың істері жөніндегі мамандандырылған ауданаралық соты 16 жастағы оқушы қызды секс-құлдықта ұстаған оқушылар мен олардың сыбайластарын соттады. Сотталушылар орнында тоғыз адам, оның ішінде кәмелетке толмағандар да бар.

Сот отырыстары жабық режимде өтті. Айыпталушылар 4 жыл 8 айдан 7 жыл 6 айға дейін бас бостандығынан айырылды.

Қызылорда облысының кәмелетке толмағандар істері жөніндегі мамандандырылған ауданаралық соты бұл қылмыстық істі ҚР Қылмыстық кодексінің:

194-бабы (Ірі мөлшерде мүлікті алу мақсатында бопсалау),

110-бабы (Кәмелетке толмаған адамға қатысты азаптау),

134-бабы (Кәмелетке толмағандарды жезөкшелікке тарту) бойынша қарады.

Сотталушылардың кінәсі оқиға орнын тексеру хаттамалары, заттар мен құжаттар, бейнежазбалар, WhatsApp мессенджеріндегі хат-хабарлар, банк шоттарынан алынған үзінді көшірмелер, сараптама қорытындылары, сондай-ақ жәбірленушінің айғақтарымен дәлелденді.

Кәмелетке толмағандар М.Н., А.Ж., Қ.Д. 6 жыл 8 айға бас бостандығынан айырылды.

Б.А., Т.Ұ. және Қ.А. 4 жыл 8 айға сотталды.

Т.А., Б.А. және Т.Д. қылмыстық құқықбұзушылықтардың жиынтығы бойынша 7 жыл 6 айға бас бостандығынан айырылды, – деп мәлімдеді сот әкімшісі Даурен Таиров.

Үкім әлі заңды күшіне енген жоқ.