«Жүрегіне шампур тығып алған». Қаскелеңде мектеп бітірушілер кеші қайғылы аяқталды

Алматы облысы Қаскелең қаласында мектеп бітіру кеші қайғылы жағдаймен аяқталды, деп хабарлайды El.kz ақпарат агенттігі.

Белгілі болғандай, ата-аналар балаларға кеш өткізу үшін коттедж жалдап берген. Мерекелік кеш кезінде сыныптастар арасында жанжал туындаған. Ұлдардың бірі өз құрдасының сол жақ кеуде тұсына кәуап пісіретін шампур сұғып алған. Оқиға орнында жәбірленуші көз жұмған. Облыстық полиция департаментінің мәліметінше, күдікті деп танылған марқұмның сыныптасы ұсталып, уақытша ұстау изоляторына қамалды.

Аталған оқиға бойынша адам өлтіру фактісімен сотқа дейінгі тергеу амалдары басталды. Сондай-ақ, кәмелетке толмаған жасөспірімнің заңды өкілдері балаларды тәрбиелеу жөніндегі міндеттерін тиісінше орындамағаны үшін әкімшілік жауапкершілікке тартылды.

Қазіргі таңда оқиғаның барлық мән-жайын анықтауға бағытталған тергеу шаралары жүргізіліп жатыр. Сонымен қатар полиция білім басқармасына өз құзыреті шеңберінде тиісті шаралар қабылдау үшін ұсыныс берді.