ЖРВИ жұқтырғандар саны артып келеді

Шығыс Қазақстан облысында жедел респираторлық вирустық инфекция жұқтырғандар саны айтарлықтай көбейді. Санитарлық-эпидемиологиялық бақылау департаментінің дерегіне сәйкес, 1 қазаннан бері өңірде 93 мыңнан астам адам ЖРВИ-мен тіркелген, деп хабарлайды El.kz интернет порталы.

Науқастардың басым бөлігі - 14 жасқа дейінгі балалар (шамамен 62,7%), олардың саны 58,5 мыңнан асады.

Департамент басшысы Қанат Тұрдиевтің айтуынша, бір жасқа толмаған 1060 нәресте вирус жұқтырған. Сондай-ақ, 276 жүкті әйелден ауру анықталған. Облыста зертханалық расталған тұмаудың 73 жағдайы тіркеліп, оның 37-сі балалар арасында.

Маман­дар өңір тұрғындарына ауру белгілері бар адамдармен байланыспауға, үйді жиі желдетіп, дұрыс тамақтануға және денсаулықты күтуге кеңес береді.

Биылғы эпидемауысымға дайындық аясында жергілікті бюджет есебінен «Гриппол плюс» тұмауға қарсы вакцинасының 75 мың дозасы сатып алынған. Бұған қоса, жұмыс берушілер мен ақылы егу пункттері үшін тағы 2 мың доза алынған. Қазіргі уақытта облыс бойынша 77 мың адам вакцина салдырған, бұл жалпы халықтың 10 пайызынан сәл асады.