Жиров Қазақстанға жиі келуінің себебін түсіндірді

Қазақстандық бокстың аңызға айналған тұлғасы, ел тарихындағы алғашқы Олимпиада чемпионы Василий Жиров соңғы уақытта Қазақстанға жиі келіп жүргені белгілі. Спортшы бұл туралы сұхбатында айтып өтті, деп хабарлайды El.kz интернет порталы Sports.kz-ке сілтеме жасап. 

Жиров 1996 жылғы Атланта Олимпиадасында алтын медаль жеңіп алып қана қоймай, ең үздік боксшыға берілетін Вэл Баркер кубогының иегері атанған еді. Сондай-ақ ол әлем чемпионатының екі дүркін жүлдегері, Азия чемпионы, Азия ойындарының жүлдегері және кәсіпқой бокста IBF тұжырымы бойынша әлем чемпионы болды. Осы атақты ол төрт жылға жуық уақыт бойы сақтап, қазақстандық бокстың тарихына жол салды.

Сұхбат барысында Жиров Қазақстанға көбіне өзінің бастамасымен келетінін, алайда кейде арнайы келісімдер де болатынын айтты. Ұлттық құрамамен жұмыс істеу жөнінде тек әңгімелер болғанымен, нақты ұсыныстар түспегенін жеткізді.

Қазақ боксшыларының соңғы жарыстарын толық көре алмағанымен, ол команданың табыстарын жігер мен үлкен ынта-жігердің нәтижесі деп бағалады. Алдағы уақытта жетістікке жету үшін спортшылардың функционалдық дайындығын және технико-тактикалық шеберлігін арттыру қажет екенін атап өтті.

Бокс стиліне қатысты пікірін білдірген Жиров: «Боксшылар кез келген стильге дайын болып, қарсыласқа өз тактикасын таңуға ұмтылуы тиіс» деді.

Қазіргі уақытта ол Дубайда жұмысын жалғастырып жүр.